EZIMBI KUHOXA UWAYDE EMIDLALWENI EMQOKA

IZOKUYA kumaCommonwealth Games ixhugela iNingizimu Afrika kulandela izindaba zokuthi uWayde van Niekerk ngeke abe yingxenye yemidlalo yezokugijima nonyaka.

UWayde ophethe irekhodi lo mhlaba le400m alenze ngowezi-2016 kuma-Olympic Games eBrazil ukuqinisekisile kwabezindaba ukuthi ngeke abe yingxenye yemidlalo yanonyaka.

Imidlalo emikhulu nonyaka ngeyamaCommonwealth Games azoqala zizine kuze kube umhla zili-15 kuMbasa (April) eGold Coast, e-Australia.

Lo msubathi ulimale nyakenye ngesikhathi edlala umdlalo wobungani weRugby.

UMengameli we-Athletics South Africa (ASA) u-Aleck Skhosana uthe bagqemeke ingozi engeqiwa ntwala ngokulimala kukaWayde.

Uthi ukungabi khona kwakhe kule midlalo kwehlisa isibalo sezindondo ebesizotholwa yiNingizimu Afrika kule midlalo.

“Kubuhlungu ukulimala kukaWayde. Kangingabazi ukuthi ukuba ubekhona ubezokwenza kangcono kunasemidlalweni eyedlule lapho abuya khona nendondo yesiliva.

"Ngendlela afithi ngayo ubezobuya negolide. Lokho bekuzochaza ukuthi unamagolide kuyo yonke imidlalo emikhulu emhlabeni okuhlanganisa ama-Olympic, nakwiInternational Association of Athletics Federation (IAAF) World Athletics Championships ngokwehlukana.

"Ukungabi khona kwakhe kule midlalo kuzolibulala izwe kodwa ngiyabethemba labo abakhona ukuthi bazokwenza kahle,” kubeka uSkhosana.

Amathemba elakuleli asebekwe kuCaster Semenya, uLuvo Manyonga, uZazini Sokwakhana, u-Anaso Jobodwana obuya eminyakeni emibili engagijimi ngenxa yokulimala.

Kuzokuthi ngoNdasa (March) i-ASA ibe nemidlalo emqoka i-Athletix Grand Prix Series ezokuba semadolobheni amathathu akuleli.

Le midlalo ixhaswe ngesamba sikaR1.3million ngabaxhasi abazomenyezelwa maduze.