ITHEMBEZINHLE INYUKE IHOLWA YINKANYEZI
EZOMPHAKATHI: Beziqinisiwe ezokuphepha
BEZIQINILE ezokuphepha izolo ngoLwesithathu ngesikhathi amaNazaretha ohlangothini lwaseThembezinhle eqala uhambo olubheke entabeni eyingcwele iNhlangakazi, eNdwedwe.
Lolu hlangothi luqala lolu hambo nje, luholwa yinkosi entsha, uPhinda “Inkanyezi Yesithathu” Shembe okhethwe emuva kokukhothama komfowabo iNkosi Vela “Misebeyalanga” Shembe. Bazalwa yiNkosi Galilee "Langa" Shembe, okiyiyona egcine ukuhola leli bandla lisahlangene.
Indlela abetshalwe ngayo amaphoyisa, ngisho nayo iNkanyezi ibilandelwa yiveni kanti amanye abenkanise eceleni komgwaqo. UMshumayeli Chancy Sibisi uthe uhambo lwabo luqale kahle kakhulu, kazibanga khona izihibe, yize beqale phambi kwesikhathi abebesihlelile. Uthi bajabule ngesibalo samaphoyisa abasibonile. “Sisuke eSibusisweni singakashayi isikhathi ebesihlele ukuthi sizohamba ngaso kanti nawo amaphoyisa ebeseyingcosana, kuthe ngokuhamba kwesikhathi sesiyofika eMtshebheni, sanda isibalo sawo, okuyinto esijabulise kakhulu,” kusho uMshumayeli Sibisi.
Ngesikhathi ILANGA lihlangana nabaseThembezinhle, bese bephumulile ezitobhini ezintathu kanti uhambo lwabo kaluthathanga izinsuku eziningi kodwa luphele khona izolo.
“Siqale ukuphumula kwaNgcobo eMzinyathi, saphinde saphumula kwaMthethwa nakwaMngadi. Kuzothi uma sesifika eThubalethu, eNdwedwe, bese abanye begibela amabhasi balande izimoto eSibusisweni ukuze bezoqhubeka ngazo ukuya entabeni. Laba abangenazo izimoto bazongena emabhasini kuqhutshekwe nohambo. Isizathu esenza ukuthi uhambo siluqede ngosuku olulodwa wukuthi kasinazo izinsuku eziningi esizozihlala entabeni,” kusho yena.
Kulindeleke ukuba behle ngoLwesithathu zili-17 kuMasingana (January) entabeni. AbaseThembezinhle banyuka nje, balandela abaseKuphakameni abaholwa yiNkosi Vukile "Ncoyincoyi" Shembe ethi baba omncane eNkosini iNkanyezi. Emuva kwabaseThembezinhle kuzokhuphuka abaseGinyezinye abaholwa yiNkosi Mudliwamafa Shembe ozalwa ngumfowabo weNkosi iNkanyezi, uNkanyezi kaGalilee Shembe.