INGQINAMBA YOKUSHODA KWEZIKHALA EMANYUVESI
BASENKINGENI abafundi abafuna izikhala emanyuvesi ngenxa yokushoda kwezikhala kanti senyukile isibalo sabakulungele ukufunda emanyuvesi nonyaka.
Seziqalile iziminyaminya bayehla bayenyuka abafundi bafuna izikhala. EMangosuthu University of Technology (MUT), eMlaza, eningizimu yeTheku, iStudent Representatives Council (SRC) yiyona echazela abafundi esangweni ngenqubo yenyuvesi - ithi uma umfundi engasithumelanga isicelo ngokohlelo lweCentral Application Office (CAO), makabuyele khona eyosifaka.
Okhulumela le nyuvesi, uNkk Mbali Mkhize, uthi bathole izicelo ezingama-43 757 kodwa banezikhala ezilinganiselwa kwezingama-4 000 kuphela njengoba ingeke idlule ezi-12 000 sekuhlanganiswe nalaba abebevele befunda.
“Kasikwazi ukuthatha abafundi abaningi ngoba nathi umnyango wezemfundo ephakeme kawusivumeli. Imali inyuke ngo-8% kwabazikhokhelayo kanti laba abasebenzisa iNational Student Financial Aid Scheme (NSFAS) kayinyukile.
"Sinezikhala eziyi-1 780 kwaFaculty of Management Sciences, zingama-673 kwaNatural Sciences, zibe yi-1 589 kwa-Engineering. Njengamanje sisamukele abafundi abayizi-3 040 kuphela,” kusho uNkk Mkhize.
Ukubhalisa eMangosuthu kuzoqala mhla zili-15 kwephezulu kanti imali yokubhalisa wu-R2 000 kwabenza izifundo zonyaka wonke kanjalo nama- semester.
UNkz Noxolo Memela waseDurban University of Technology (DUT), uthi bathole izicelo zabafundi eziyizi-92 464 kodwa inyuvesi inezikhala eziyizi-7 500. Uthi ukubhalisa kuzoqalwa mhla zili-15 kuyona le nyanga bese amakilasi aqale mhla ziyisihlanu kuNhlolanja (February). “Inyuvesi kayikwazi ukwamukela isibalo esingaphezulu kwezikhala ezikhona.
Uma umfundi ezobhalisela uku- funda unyaka wonke, kumele akhokhe u-R3 690, ababhalisela ingxenye yonyaka ( semester courses) bona bakhokha u-R2 260.
"Uma umfundi efuna indawo yokuhlala okungeyesikhungo, kumele akhokhe u-R7 380.
Le mali ihlanganisa ukubhalisa nendawo yokuhlala kulabo bezifundo ezihlelelwe unyaka wonke kanti abezifundo eziyingxenye yonyaka wu-R4 530 sekuhlangene. Le mali kakusiyona eyezifundo kodwa ngeyokubhalisela ukungena enyuvesi nokuthola indawo,” kusho uNkz Memela.
Okhulumela i-University of KwaZulu-Natal (UKZN), uNkz Normah Zondo, uthi bathole izicelo eziyizi-91 002 kodwa bazokwamukela abafundi abafikayo abasha abayizi-8 776 kuphela.
Uthi ngolunye ulwazi lwemali, abafundi bangavakashela kulesi sizabulwembu ( website): www.ukzn. ac.za
I-University of Zululand (Unizulu) kuzobhaliswa mhla zili16 kwephezulu. ngokusho kukaNkz Snegugu Ndlovu oyibamba lomkhulumeli wale nyuvesi, banezikhala eziyizi-3 900 zabafundi abazokwenza unyaka wokuqala. Imali yokubhalisa wu-R3 000 kanti uma ufuna ukuhlala ngaphakathi enyuvesi wu-R4 000.