UMSINDO KUQOKWA OWAMA-SATMA KWA-XHOSA
EZOMPHAKATHI: Bathi akazi lutho ngezinto zakwaXhosa
SIKHULU isililo kosomabhizinisi baseDutywa namaphethelo, e-Eastern Cape, okuthiwa basola uMnu Dumisani Goba - ongumsunguli weSouth African Traditional Music Achievement Awards (Satma) - ngokubathathela umsebenzi wokuhlela umcimbi wokugubha usuku lokuzalwa kweKumkani yamaXhosa, uZwelonke Sigcau.
Umcimbi uzokuba ngoMbasa (April), uzokwandulelwa yimigubho okuthiwa izoqala ngenyanga ezayo. Ikumkani izobe iqeda iminyaka engama-50 idla anhlamvana.
ILANGA lithole ngemithombo yalo ethembekile ukuthi kunosomabhizinisi abangafuni nokuyizwa eyokuthi uMnu Goba engamele lo mcimbi omkhulu futhi abathi ubaluleke kakhulu esizweni sakwaXhosa.
“Kunosomabhizinisi abathi kabaqondi ukuthi kungani indlunkulu ikhethe ukunika uMnu Goba umsebenzi obaluleke kangaka ngoba bekhala ngokuthi ungowaKwaZulu futhi akazi lutho ngendlela yokuphila kwabantu bakwaXhosa,” kusho lo mthombo.
Omunye usomabhizinisi okhulume naleli phephandaba kepha wathi ucela ligodlwe igama lakhe, uthe lokhu kubakhombisa ukuthi indlunkulu ibavalela ngaphandle noma kayikholelwa kubona. ILANGA lithole ukuthi ikumkani izolugubha ngendlela ehlukile usuku lwayo lokuzalwa njengoba izolusebenzisa ukwethula izinhlelo enazo ngokubuyisela emphakathini. Okhulumela ikumkani, iNkosi Xolile Ndevu, uvumile ukuthi ikumkani inikeze uMnu Goba umsebenzi. “Kunento abantu abaningi abangayiqondi, ikumkani noDkt Goba banobudlelwano njengoba bejwayele ukusebenzisana nokwesekana kukhona konke abakwenzayo. Ikumkani beyimxhasa (uMnu Goba) nangesikhathi amaSatma esekulesi sifundazwe sethu. “Kuthe ngonyaka odlule igubha usuku lokuzalwa, uMnu Goba wasuka KwaZulu-Natal walibhekisa eDutywa eyogubha nayo,” kusho iNkosi Ndevu. Ithi yilapho-ke ikumkani ibeke izifiso zayo kuMnu Goba zokugubha usuku lwayo lokuzalwa nonyaka. “Ibe isimthuma ukuba ahambe phambili ekuhleleni lo mcimbi. Lokhu ikwenze ngoba iyamazi ukuthi ugijima kangakanani futhi iyawazi namagalelo nothando lwakhe ezintweni zesintu. “Kayibhekanga ukuthi uphuma kusiphi isifundazwe kepha ibheke ukuthi uGoba uyayiqonda yonke le nto efisa ukuyenza nebikhuluma ngayo. “Njengengane ethumekayo, uqale ngonyaka odlule uGoba ukusebenzisana nendlunkulu ukuhlela le micimbi,” kusho yena. Ukukhahlele ngezinyawo zombili ukuthi osomabhizinisi bendawo noma abangaphansi kwesandla sekumkani bavalelwe ngaphandle. “Bonke abantu abafisa ukufaka isandla bavumelekile ukwenza lokho njengoba bekhona nasebekuvezile - abangaphansi kwayo ikumkani ukuthi bafisa ukusebenzisana noGoba ekubeni lo mcimbi ube seqophelweni eliphezulu,” kusho iNkosi Ndevu.
UMnu Goba uvumile ukuthi ikumkani imcele ngonyaka odlule ukuba ahlele lo mcimbi.
“Okungithathile nokungijabulisile kube wukuthi ikumkani ifuna ukugubha usuku lwayo nesizwe sayo nokubuyisela emphakathini, ikakhulukazi kubantu abahlwempu.
Kuyimpilo yami ukusiza abantu, ngakho-ke ngivumele phezulu ngoba bengiwuqonda kahle umbono wekumkani,” kusho uMnu Goba.
Uthi kakukho mali ekhishwe yi Ndlunkulu yamaXhosa - mayelana nalo mcimbi - kwazise kayitholi mali kuhulumeni.
Akwenzile ngokubambisana nayo, wukucela usizo lwemali noxhaso ezinkampanini ezizimele nakwezinye izinhlaka ezahlukene,” kusho yena.