Kuboshwe indodana "nezinkabi" ngokufa kukayise
Imshayele ucingo
USHAQEKILE umndeni wakwaKheswa eSibizane, eCreighton, eningizimu yeKwaZuluNatal kuboshwa indodana yawo eneminyaka engama-24 ubudala “nezinkabi” ezimbili ngezinsolo ezimayelana nokubulawa kukayise - isidumbu sakhe sitholwe sinembobo yokudutshulwa ekhanda.
Indodana kamufi, uMnu Mmeli Kheswa (65) - esingeke siyidalule ngenxa yokuthi kayikaveli enkantolo - iboshwe ngamaphoyisa aseXobho ngesikhathi etheleka endaweni lapho kwenzeke khona isigameko.
Isidumbu sikaMnu Kheswa sitholakale emotweni yakhe eNhlamvini, eMkhomazi, lapho amaphoyisa ethole kumakhalekhukhwini wakhe ukuthi ugcine ukushayelwa yindodana yakhe.
Kuvela ukuthi ngoLwesine umufi uthole ucingo luvela endodaneni yakhe - okungaziwa ukuthi ibithini kuyena - waphuma kwakhe engumuntu obuyayo.
Kusolakala ukuthi ulalelwe unyendle ngesikhathi ezitshela ukuthi uyohlangana nendodana yakhe mayelana nabakhulume ngakho ocingweni.
Kuthiwa yiyona futhi ekhombe izinkabi ezitholwe ngamaphoyisa eMgungundlovu, maphakathi neKwaZulu-Natal.
Umufi ubenoxhaxha lwamabhizinisi, enamakhosikazi amathathu.
Bese kusele iminyaka emithathu ukuthi athathe umhlalaphansi emnyangweni wezokuthutha abesebenza kuwona eXobho.
Abasondelene nomndeni, batshele ILANGA ukuthi indodana engumsolwa wokuqala kuleli cala, ibithandwa kakhulu nguyise njengoba ebeyitakula nasezikweletini ebibhekene nazo kwazise kuthiwa “iyiphara” ebelihamba lithatha imali yabantu libathembise amathenda.
Umthombo weLANGA uthi kuyasolakala ukuthi indodana ibi- bheke ifa njengoba uyise enamatekisi namathaveni futhi kuyiyona yodwa indodana yakhe.
“Kuyezwakala ukuthi ukuhlelile lokhu ngoba azi ukuthi uyise usezothatha umhlalaphansi futhi kunemali ezophuma uma eseyekile emsebenzini,” kusho umthombo.
Uthi ubufakazi balokho wukuthi umsolwa akakhulumi into eyodwa emaphoyiseni ngoba uthe ubesuka eThekwini eyonikeza uyise imali ewu-R 40 000 aphinde athi bekuwu-R 60 000. Okushiya imibuzo wukuthi kungani enqume ukuyomnikeza le mali esigangeni kunokuba bahlangane kubo.
Ikhansela lendawo, uMnu Nduduzo Kheswa - elisondelene kakhulu nalo mndeni njengoba umufi bekunguyise omncane - lithe: “Yena umfowethu (indodana kamufi) ubethandwa kakhulu ngubab’ omncane, emenzela yonke into ngoba nguyena yedwa umfana ezinganeni zakhe,” kusho uMnu Kheswa.
ULt Colonel Thulani Zwane okhulumela amaphoyisa KwaZulu-Natal, uthe kunabantu abathathu ababoshiwe mayelana nokubulawa kukaMnu Kheswa bazovela namhlanje ngoMsombuluko eNkantolo yeMantshi yaseXobho.
Imbangela yokubulawa kukaMnu Kheswa uthe ibingakaziwa kodwa amaphoyisa asaphenya.
“Kuyezwakala ukuthi ubekuhlelile lokhu ngoba azi ukuthi uyise usezothatha umhlalaphansi.