"Uhlahlele" udadewabo
Ubagqibe emgodini owodwa
KUSOLWA umbango wefa ngesigameko sokubulawa kowesifazane nendodana yakhe baseSidakeni, eMandeni, izidumbu zabo ezitholwe ngoMgqibelo zigqitshwe egcekeni.
Kusolakala ukuthi umfowabo kaNkz Zoe Buthelezi (49) nendodana yakhe uMthunzi Buthelezi (19) babulawe ngumfowabo (kaNkz Buthelezi) oneminyaka engama-47 - esingeke simdalule njengoba esagcwele izinkalo.
Isidumbu sikaNkz Buthelezi sitholwe kulo mgodi - osegcekeni lomsolwa - olinganiselwa emamitheni amabili siqotshiwe kanti esendodana sona besiboshiwe ezinyaweni.
Lo mkhuba kuthiwa umsolwa uwugile ngoLwesibili olwedlule. ILANGA lihambele endaweni yesigameko izolo ngeSonto lafica amalungu omphakathi emi izixongololo eduze komuzi kaNkz Buthelezi, ebabaza isihluku. UNkz Buthelezi ubehlala nendodana yakhe kubo, enezindlu aqashisa ngazo ezizungeze umuzi. Kusoleka ukuthi umfowabo ubenomona ngemali yezindlu zomqasho ebitholwa ngudadewabo njengoba kuthiwa ubeke afike kwesinye isikhathi eyoyifuna.
Amalungu omphakathi esikhulume nawo, achaze umsolwa njengomuntu ononya, obengakhulumi nomakhelwane nobudlelwano bakhe nomndeni wakhe bebungebuhle. UMnu Mondli Madlopha oyisoka likaNkz Buthelezi, uthi ugcine ukukhuluma nomufi ngoLwesibili abulawe ngalo.
“Ngigcine ukumbona ngoLwesibili ntambama ngiphuma emsebenzini. Ngifike endlini yakhe kukhona umfowabo. Ungiphakele ukudla wabe esecela ukuba ngimlungisele igilobhu kagesi ebingakhanyi. Ngiqede lapho ngacela indlela ngoba bengenqena ukubaphazamisa‚" kusho uMnu Madlopha. Uthi ngaphambi kokuba ahambe, umsolwa ukhulume naye eceleni ethi uzwe kuthiwa uMthunzi uyahlukumezeka, kodwa wagcina engamchazelanga ukuthi ngandlelani. Uthi baphazanyiswe wukuqhamuka kukaNkz Buthelezi.
“Ngibashiye endlini ngididekile ukuthi uqonde ukuthini uma ethi uMthunzi uyahlukumezeka. Ngitshele unina ukuthi sizokhuluma ngakusasa. Ngibashiye behleli bobabili kungekho lutho olusolisayo ukuthi kunokungezwani, ngabuyela endlini yami,” kusho uMnu Madlopha. Kuthiwa umsolwa ubengeyena umuntu okhonze ukukhuluma, bekuyindoda evame ukuzihlalela yodwa, ingaphuzi futhi ingabhemi.
“Ngizwe ngomakhelwane esiqashe nabo ukuthi bezwe uZoe ekhala, engimemeza ecela ukuba ngimsize, kuzwakala sengathi kukhona axabana naye endlini yakhe.
Bathi kube yisikhathi esincane ekhala bezwa sekuthulekile. Siqale ukusola ukuthi kukhona okushaya amanzi ngoba sekuphele izinsuku singamboni egcekeni nendodana yakhe, sekulokhu kuphithiza umfowabo," kusho uMnu Joseph Dube oqashe emzini kaNkz Buthelezi - okunguyena ohlabe umkhosi emaphoyiseni.
"Kuthe uma simbuza ukuthi uphi uZoe nendodana yakhe, wathi usethuthile uyohlala eMgungundlovu uthole umsebenzi omusha, uMthunzi uyofunda eNkandla," kusho yena. Uthi bebelokhu bebona umfowabo kamufi ephuma eqhuba ibhala izikhawu eziningi ebheke ngasemzini wakhe. Leli bhala bathi ubelimboze ngengubo bezitshela ukuthi uthutha izimpahla zikadadewabo uyozifaka emzini wakhe ngoba esethuthile kanti ubethutha izicubu zesidumbu eyozigqiba egcekeni lomuzi wakhe oseduze nokadadewabo.
UMnu Dube uthi umsolwa ubesephithiza emzini kadadewabo, eseqalile nokukhuluma neziqashi ecela imali yerenti, ezitshela ukuthi sekuzokhokhwa kuyena. Uthi umsolwa ubengafuni muntu osondela endlini kadadewabo enqabela ngisho udadewabo omdala - ongahlali kude kunabo - obeyobheka uNkz Buthelezi.
UMnu Dube uthi ngoMgqibelo ekuseni uye emaphoyiseni eyowabikela ngokunyamalala kukaNkz Buthelezi nendodana yakhe. “Ngiphambane nomsolwa ekuseni ngoMgqibelo ephuma endlini kadadewabo. Amaphoyisa alusukumele ngokushesha udaba ngiwabikela, afika umsolwa engasekho endlini kadadewabo. Agqekezile athola amachaphazela egazi phezu kuka matilasi, okusoleka ukuthi umhlahlele phezu kwawo.
"Kuthe uma sifika endlini yakhe nakhona ebeseshaye wachitha. Amaphoyisa aqaphele ukuthi kunendawo embiwe eceleni kwendlu yakhe, okuthe uma kumbiwa kwatholakala izidumbu zabo bobabili emgodini owodwa," kusho uMnu Dube. Umphakathi ukhale ngonya lukamsolwa uthi usengaze abulale udadewabo ngoba efuna imali yeziqashi. Ugcine ungqo-ngqisa umuzi kamsolwa ngomlilo. UNkz Buthelezi ubulawa nje, ubesanda kuqeda ukulungisa umuzi wakhe ngoZibandlela (December).
Okhulumela amaphoyisa KwaZulu-Natal, uLt Colonel Thulani Zwane, uthe umsolwa usagcwele amathafa, amaphoyisa asezithendeni zakhe.
Uthi okwamanje kayikaziwa imbangela yokubulawa kwabo. “Sicela ukuthi naye aziveze emaphoyiseni ukuze ezosichazela uhlangothi lwakhe ngokwenzekile,” kusho Lt Colonel Zwane.