BASAMILE KWELOKUNGAZIFUNI IZINHLANGA EMALOKISHINI
KAYIKHO evuma ukugoba uphondo phakathi kwezinhlangano ezimbili zabangcwabi emuva kokuba kubikwe ukuthi izimoto zabangcwabi abamhlophe nabangamaNdiya kazisafuneki emalokishini.
Lokhu kuqinisekiswe yinkulumo kaMnu Mlungisi Chiliza obhekele ezokuxhunana kwiNational Funeral Parlours Association (Nafupa), okubeke kwacaca ukuthi bazokwenza konke okusemandleni abo ukuvikela amalungu abo amhlophe nangamaNdiya.
Kuvela nezindaba zokuthi uma beya kulezi zindawo izimoto zabo zizothungelwa ngomlilo.
UMnu Chiliza usho lokhu nje, kuzokhumbuleka ukuthi emasontweni amabili edlule ILANGA libike kabanzi ngalolu daba lapho abeNational Funeral Practitioners Association of South Africa (Nafupa SA) bebeke umnqamulajuqu wokuthi kusukela mhla lulunye kuNhlolanja (February) kabasafuni ukubona izimoto zabangcwabi abangamaNdiya nabamhlophe emalokishini.
Kulolu daba kubikwe ukuthi iNafupa SA lokhu ikusho ngoba ihlose ukuthuthukisa abangcwabi abamnyama njengoba kubo- nakala sengathi kabenzi kahle kulo mkhakha webhizinisi.
Iveze ukuthi kusukela ngoNhlolanja, ifuna bonke abangcwabi basebenze nohlanga lwakubo futhi ngalapho behlala ngakhona.
Emuva kwalolu daba, kube nomhlangano ngoLwesithathu olwedlule obuphakathi kweNafupa SA neNafupa kodwa wagcina ungathelanga izithelo njengoba abeNafupa SA besamile kwabakushoyo.
UMnu Chiliza uthi bazokwenza konke okusemandleni ukuvikela amalungu abo.
“Njengoba besaqhubeka ozakwethu nalo mnqamulajuqu wokuthi abamhlophe ngeke besangena ezindaweni zabo, sizokwenza konke okusemandleni ethu ukuba sivikele amalungu ethu, kodwa silandela umthetho.
"Sikhulumile noMnyango wezokuThuthukiswa koMnotho KwaZulu-Natal, silindele uku- hlangana noNgqongqoshe Sihle Zikalala ngesonto elizayo ukuze ezongenelela.
"Ngisho ngabe kumele sicele amaphoyisa ukuba angenele, sizokwenza lokho inqobo nje uma kuphephe amalungu ethu. Lokhu sikwenza ngoba kasihambisani nabakushoyo futhi sinawo amalungu aseNdiya nalawo amhlophe ngaphansi kweNafupa SA,” kusho uMnu Chiliza.
UMnu Nkosentsha Shezi ongunobhala-jikelele weNafupa SA, uthi bona basamile kwabakushoyo kodwa waziqhelanisa nokuthi bazoshisa izimoto.
Uthe bona kabayona inhlangano yodlame kodwa iqiniso lithi kabalindele ukubona abangcwabi abamhlophe nabangamaNdiya kusukela mhla lulunye kuNhlolanja.
"Umuntu okhulume leyo nto (yokushiswa kwezimoto) kumele amelane nayo kodwa thina njengeNafupa SA kasikaze sisho njalo,” kusho yena.
Uvumile ukuthi bekunomhlangano ngoLwesithathu kodwa abeNafupa bawuduba kusaxoxwa, kodwa abasalile bavumelene nesiphakamiso sabo.
Okhulumela uMnyango wezokuThuthukiswa koMnotho KwaZulu-Natal, uMnu Siyabonga Maphumulo, uthi ungqongqoshe ulutholile ubhalonyazi ( e-mail) obeluthunyelwe ngabeNafupa.