UMFUNDI UHLONISHWE WUMASIPALA WAKHE NGESHEKE LIKA-R50 000
UPHOQELEKE ukuyokwenza umkhakha weMechanical Engineering e-University of Cape Town ngoba ezwe kuthiwa lona afuna ukuwenza wePetroleum Engineering, kawukho eNingizimu Afrika umfundi ogile izimanga ethola o-A ezifundweni eziyisi-7 abezenza eKusasalethu High School, eMtubatuba.
Ngaphandle nje kokuthola o-A abayisi-7, uGeorge Mkhabela (17), uthole u-100% kwiMaths wathola u-95% kwiPhysics. Yize ethole le miphumela, uthi akeneme ngayo - ikakhulukazi eyePhysics - kwazise uyazi ukuthi ubengenza kangcono kunalokhu.
Lo mfundi uphase zonke izifundo zakhe eziyisikhombisa ngo-A. Leli bhungu lensizwa liqale isikole lineminyaka eyisihlanu kanti lithi lizokwenza izifundo zeMechanical Engineering eNyuvesi yaseKapa, kodwa nakhona kalikabi naso isiqiniseko njengoba lisalinde ukuba babuyele kulona.
NgoLwesithathu olwedlule le nsizwa ihlonishwe wuMasipala waseMtubatuba ngesheke lika-R50 000. Imeya yalo masipala, uMnu Velenkosini Gumede, ithe bayaziqhenya kakhulu ngoGeorge ngoba ubeke uMtubatuba ezingeni eliphezulu.
"Kungethusile ukuthi athi ephumelele kahle kangaka athi akeneme ngemiphumela yakhe. Lokhu akwenzile kwanele, kumele akujabulele ngoba uphase kahle ngendlela eyisimanga. Siyethemba ukuthi nenye intsha izofunda lukhulu kuyena.
"Njengomasipala, sizimisele ngokumlekelela uma kuwukuthi kunezingqinamba abhekana nazo enyuvesi kodwa ngendlela ephumelele kahle ngayo siyazi ukuthi uzothi efika nje athole umfundaze,” kusho uMnu Gumede.
Uthishanhloko waseKusasalethu, uMnu Dumisani Biyela, uzwakalise ukuziqhenya ngomfundi wakhe, wathi kakubethusanga ukuphumelela kwakhe ngalolu hlobo.
“Ngamtshela kuqala unyaka ukuthi ngifuna ukuba ayoxhawula ungqongqoshe wezemfundo uma sekuphuma imiphumela.
"Ngempela ukwenzile lokho kanti kusukela kuqala unyaka, ubeyingane ezimisele ngendlela eyisimanga,” kusho yena.
Uthi uGeorge ubebamba iqhaza elikhulu ekufundiseni abanye abafundi ekilasini.
NgokweHire Education.co.za, umkhakha wePetroleum Engineering ukhona eRhodes University, eStellenbosch University, e-University of Cape Town, e-University of South Africa, e-University of KwaZulu-Natal naseWits University.