USWELE IMALI YOKUYOFUNDELA UBUDOKOTELA OPHASE NGO-"A"
USEZAME wehluleka ukuthola umfundaze ozokhokhela zonke izindleko zakhe zesikole umfundi othole o-A abayisi-8 nakuba esemukeliwe e-University of Cape Town (UCT) ukuba ayokwenza iziqu zobudokotela.
UMusawenkosi Biyela (19), obefunda eSibusisiwe Comprehensive Technical High School, eMbumbulu, uthi okumkhathaza kakhulu wukuthi akasithumelanga isicelo sokutshelekwa imali kwiNational Student Financial Aid Scheme (NSFAS) ngoba ubengenalo ulwazi lokuthi kuzosheshe kuvalwe ukwamukelwa kwezicelo zabaswele.
Uthi okwenze ukuba abe mathintanyawo ukuthumela isicelo, wukuthi ubematasa kakhulu nezincwadi zesikole kanti isitifiketi sokushona kukayise - ebesizomsiza uma ebhalisela uxhaso - sihlala emndenini wakubo ozinze eMelmoth, kuze kwadlula isikhathi esiwumnqamulajuqu engakasitholi.
“Ngithathiwe enyuvesi, osekusele nje wukuba ngithole umfundaze ngoba umama usebenza esitolo setiye, kayikho ngisho imali yokungikhokhelela indawo yokuhlala eCape Town.
"Imali abekade engibekele yona unyaka wonke, ngizokwazi ukuthenga ngayo ithikithi lokuya eCape Town, ngithenge izimpahla zokugqoka nezinto ezincane ezizongisiza ezifundweni uma kuhambe kahle. Imfundo iyabiza kakhulu, ngiyaludinga usizo,” kusho uMusawenkosi.
Uthi usathumele isicelo somfu- ndaze kwiSolomon Mahlangu Bursary nakuMasipala weTheku kodwa ubengakaphendulwa. Uveze nokuthi ubezinikela kakhulu emfundweni ngoba elwazi usizi lwakubo.
“Othisha bengibahlupha nangesikhathi sabo sekhefu ngoba bengifuna imiphumela emihle,” kusho uMsawenkosi.
Ezifundweni zakhe, IsiZulu usiphase ngo-86%, i-English u-88%, iMathematics u-98%, iLife Orientation u-99%, i-Accounting u-91%, iGeography u-90%, iLife Sciences u-89% iPhysical Sciences u-96%.