"KWENQATSHWE" NESITIFIKETI SOKUSHONA KUKAYISE WAPHUTHELWA NGEYESIKHWAMA SOKUSIZA ABAFUNDI
BELUBHALWE emehlweni usizi kumfundi owemukelwe eDurban University of Technology (DUT), ukuyokwenza iziqu zeNautical Sciences, kodwa engenayo imali yokukhokhela isikhala sakhe ukuze singathathwa ngabanye abafundi.
USabelo Majola (19), waseNanda, eThekwini, uthi usenkingeni enkulu njengoba ebethembele kwiNational Student Financial Aid Scheme (NSFAS) kwathiwa isicelo sakhe kasemukeleki ngenxa yokuthi ubuso bukamazisi kaninakhulu kabubonakali.
ILANGA lifice lo mfundi eda- ngele kuyona le nyuvesi, ephethe nencwadi ewubufakazi bokuthi wamukeliwe kodwa esetsheliwe ukuthi sesidlulile nesikhathi sezicelo kumele azikhokhele eyokubhalisa.
"Kangazi kumele ngenzenjani ngoba isimo kasihambi kahle ekhaya. Bese ngithembele kuyona le mali nale mfundo yamahhala emenyezelwayo,” kusho uSabelo. Ubefunda eJ.G Zuma High School, uthole o-A ababili kwiMathematics neLife Sciences kanti kulezi ezinye izifundo uthole o-B.
Uthi ubona lishabalala iphupho lakhe lokufundela lezi ziqu eziphathelene nezasemanzini nemikhumbi.
Ngokuthola kweLANGA, uSabelo uthathwe ngothisha bakhe bamcelela kwesinye isalukazi esakhe eduze nesikole ukuba simcuphise kuze kube uphothula umatikuletsheni ngenxa yokuthi ubelova esikoleni ngenxa yokweswela imali yokukhokhela imoto ebithutha abafundi.
Unina kaSabelo, uNkz Bongekile Majola, uthi kuphithene ikhanda, akazi uzoyithathaphi imali yokuba kubhalise ingane yakhe enyuvesi.
"Kangisebenzi, kwayena uSabelo nezingane zakwabo ngibakhulisa kanzima. Sengicela noma ngabe ngubani ofisa ukungisiza ukuba alekelele. Isicelo seNSFAS use- ngasithumela esengenile esikoleni,” kusho uNkz Majola.
Utshele leli phephandaba ukuthi okunye okuyinkinga enkulu wukuthi umyeni wakhe wadlula emhlabeni esethandana nomunye wesifazane.
Lokho uthi yikhona okuholele ekutheni bangakwazi ukuthola isitifiketi sokushona kukayise kaSabelo njengobufakazi bokuthi akasenaye uyise.
“Sizamile ukuthola isitifiketi sahluleka. Ngiyehla ngiyenyuka kangazi izophumaphi imali engaka,” kusho yena.
Imali yokubhalisa kule nyuvesi wu-R3 690.