Silindele ukuba azifeze izethembiso uRamaphosa
UMENGAMELI we-African National Congress, uMnu Cyril Ramaphosa, uqale ngenothi elihle ngesikhathi ethula inkulumo yakhe emcimbini obuse-East London, e-Eastern Cape wokugubha iminyaka eli-106 leli qembu lasungulwa. UMnu Ramaphosa, obuye abe yisekela likaMengameli wezwe, uMnu Jacob Zuma, uqale umcimbi ngesikhathi - okuyinto engajwayelekile kule nhlangano - eyinkomba yokuthi izinyo ligaya ngomunye umhlathi.
Enkulumweni yakhe eyamukelwe ngesasasa ngamalungu e-ANC, ezinkundleni zokuxhumana, nayizingqapheli zepolitiki, uMnu Ramaphosa wethembise ukuthi uhulumeni obusayo uzolwa nenkohlakalo, wathi amasela antshonsha imali kahulumeni azoboshwa, ashushiswe, wabuye wanxenxa abatshali-mali ukuba bafake imali yabo emabhizinisini aseNingizimu Afrika ukusiza ukuba umnotho ukhule futhi kwande namathuba emisebenzi.
Akekho umuntu olithandayo izwe lethu futhi olifisela okuhle nabantu abalakhele ongaphikisana nokushiwo yisekela likamengameli. Inkulumo yakhe ikhombisa ukuthi uyaziqonda impela izinkinga ezibhekene nabantu. Indaba izoba sekutheni ngabe uMnu Ramaphosa uyigagu lokukhuluma nje kuphela noma okuphuma emlonyeni wakhe kulandelwa yizenzo ezibonakalayo, ezidala uguquko ezimpilweni zabantu.
Sikusho lokhu ngoba kuzokhumbuleka ukuthi iqembu elibusayo, i-ANC, liyaziwa ngokuba nezinhlelo ezihehayo futhi ezethembisayo nokwenza izethembiso kubantu. Izinkinga zivela uma sekufanele ziye ngamagama enkehli, lokho okwakuthenjisiwe sekumele kwenzeke.
Ukwenza isibonelo nje, ngaphambi kokhetho lukazwelonke lowezi-2009, uMnu Zuma obekhankasela isikhundla sokuba ngumengameli wezwe, uthembise abavoti ukuthi uhulumeni wakhe uyodala imisebenzi uma abavoti benganika i-ANC ithuba lokuphatha izintambo zombuso. Ubuye wathembisa ukuqeda ubugebengu obudlangile ezweni. Sekuwumlamndo ukuthi kunokuba kudalwe amathuba amaningi emisebenzi njengoba uMnu Zuma ubethembisile, kwenzeke okuphambene nalokho.
Izinkulungwane zabantu zilahlekelwe yimisebenzi, kwathi ezinye izinkampani zavalwa. Ubugebengu budlangile, ikakhulukazi ezindaweni zabantu abampisholo, asebephilisa okwezinyamazane ngenxa yezinswelaboya. Sethemba ukuthi uMnu Ramaphosa uzozigcina izethembiso azenzile ukuze kusizakale abantu bakithi.
Kakuyona into esijwayele ukuyishayela ihlombe ukuhlale kuxoshwa ongqongqoshe bakahulumeni ezikhundleni, njengoba kukade kuwumkhuba kaMnu Zuma. Lokhu kwenza kungabi nozinzo kuhulumeni nomsebenzi ungenzeki kahle ngenxa yezinguquko eziyisigubhukane. Kodwa iqiniso elimsulwa wukuthi kule khabhinethi ekhona, kunamalungu angafanele ukuba laphaya ngenxa yokuba nomlando wokungawenzi umsebenzi abekelwe wona.
Uma uMnu Ramaphosa eqinisile ukuthi ufuna ukulungisa izinto ngendlela uhulumeni osebenza ngayo, kuzofanele yena neqembu lakhe bakhombe indlela ongqongqoshe abahlulwa wumsebenzi futhi abanukwa ezenzweni zenkohlakalo. Kakudingi nokuthi sibabalule ngamagama, bayaziwa yizwe lonke.
Esikhathini esibi kwezomnotho wezwe, kungaba yisinyathelo isihle futhi ukunciphisa iminyango kahulumeni ukuze kongiwe imali. Iqiniso elingephikwe wukuthi empeleni kunongqongqoshe neminyango kahulumeni okungaziwa ukuthi benzani. Izwe selibheke uMnu Ramaphosa ukuba angagcini nje ngokukhuluma, kodwa enze njengoba ethembisile.