Ungashona uma usika ama- keloid esemakhulu
KUNEZIFO ezinamagama azwakala emnandi okuthi uma kukhulunywa ngazo uze uconse amathe, uzitshela ukuthi kukhulunywa ngokudla okumnandi kanti wukugula.
Namhlanje sizobheka esinye salezi zifo okungesesikhumba, ama- keloid - njengoba le nyanga ngokwekhalenda lezempilo kungeyokwexwayisa ngomdlavuza wesikhumba.
Ngeshwa kalikho igama lesiZulu elichaza ama- keloid ngaphandle kokuthi yindlela isikhumba esisuke siphola ngayo uma kade ulimele. Kwabangenayo inkinga yamakeloid uma isikhumba siphola, siba noqweqwe olumnyama lugcine seluziphumela uma sekuphole kahle. Kubantu abanama- keloid lokhu kakwenzeki, esikhundleni sokuba isikhumba sibe noqweqwe olumnyama uma sesiphola, sivele sibe nensumpa ecwebezelayo kuleyo ndawo elimele.
Leyo nsumpa ikhula idlule isilonda, ize ibe sapapamuzi elingagcina selilingana nequpha noma ngaphezulu.
Ngokwemedicine.net, ama- keloid kakwaziwa ukuthi adalwa yini ngaphandle kokuthi yindlela isikhumba esiphola ngayo uma kade silimele. Athanda ukumila esifubeni, engalweni, emhlathini nangemuva kwezindlebe.
Abantu abanesikhumba esinsundu yibona abathandwa kakhulu ngama- keloid, enjalo nje kawakhethi, aphatha abesilisa ngokulinganayo nabesifazane. Ngokujwayelekile uma kukhona emndenini onawo, kuba khona omunye azomphatha. Nakuba kunjalo, kalukho ucwaningo olwenziwe oluqinisekisa ukuthi athelelana ngokozalo.
Ongoti bathi kune- gene ebizwa nge-AHNAK okuyiyona abakwazi ukubona ngayo ukuthi umzimba womuntu usengcupheni enkulu yokuphathwa ngama- keloid njengoba imvamisa abantu abanale gene yibona abanalesi sifo. Ongoti bezempilo bathi ama- keloid kubantu abaningi kawayona inkinga ngaphandle kokuthi uma emile ebusweni kawukhululeki. Kwabanye uma esemakhulu, aba buhlungu ngoba kuyenzeka avimbe indlela igazi elihamba ngayo emzimbeni.
Igazi uma lifika kuleli papamuzi kalibe lisakwazi ukudlula lisabalale nomzimba, ligcina selifuna ukuphuma emzimbeni ngokuthi lizenze ithumba elizovuthwa liphume ubomvu. Yingakho abanama- keloid behlala bekhala ngezinhlungu namathumba angapheli.
Onayo angasizakala ngomjovo owenza ukuba izinhlungu zokushisa kwethumba zingabi zinkulu. Uma ama- keloid lawa egcwele umzimba wonke, ungaba nenkinga yokuphathwa yithumba emuva kwethumba, kwesinye isikhathi amanye aze amile isikanye.
Ukuthola umuthi wokugcoba ozokwenza isikhumba sithambe ukwenzela ukuba igazi lidlule kahle emzimbeni.
Ukuwasika kungaba yikhambi uma esemancane, kakugqugquzelwa ukuba asikwe uma esemakhu- lu ngoba umuntu angopha kakhulu agcine ngokushona.
Ngokwe-Dermatology Online Journal, yinkulu ingcuphe yokuthi ama- keloid abuye emuva kokuhlinzwa ngesikhathi isilonda sesithi siyaphola. Yingakho kubalulekile ukuthi ohlinziwe asebenzise umjovo wama- steroid ukunciphisa ubungozi bokuthi ama- keloid abuye emuva kokuhlinzwa.
Uma esemakhulu, odokotela bathi kuyenzeka abe yizinkomba zomdlavuza wesikhumba. Yingakho baye bakuxilonge bese benza i- biopsy - okuwukusika isikhumba esincane siyohlolwa ukuthi ngabe kakusiwona yini umdlavuza wesikhumba lona okhulisa ama- keloid.
Kakukho ukudla ongoti abangathi kumele ukugweme uma unamakeloid kwazise kawakhuliswa wukudla esikudlayo. Izinto umuntu onama- keloid okumele azigweme bathi wukulimala, wukugcaba, wukugqobhoza izindlebe nokudweba umzimba ngama- tattoo. Olunye ulwazi luthekelwe kwi-medicine.net ne-healthline.com