OSOPOLITIKI BAZOKUJIKELA NJENGESIQATHA ESISWINI
BAKWETHU, ngaphandle kwamancoko, ake nitshele mina ngitshele abelungu, kupoka abanjani?
Phela isikhathi sokuba uSenzo Meyiwa afike ngephupho sesiphelile, sekufanele apoke manje futhi apoke with passion, ukuze kuvele umbulali wakhe.
Umuntu owaziyo ukuthi uSenzo wabulawa ngubani, unesibindi esiyi- alluminium, uyise walo mfana, uMnu Sam Meyiwa esekhala kangaka!
Umuntu omdala ufike wakhala ngebhesi kwangezwa muntu, wakhala nge- baritone, wakhala tenor kwathuleka, wakhala ngecountertenor, kwaba yi- alto, usekhala nge- soprano manje kakuzwa muntu! Mina njengomzali owake washonelwa yingane, ngiyabazi ubuhlungu obubhekene noMeyiwa.
Kunabantu abaziyo ukuthi ingane yakhe yabulawa ngubani kodwa bathule nje sengathi bafile. Cabanga nje, umuntu omdala useze ubeka amathemba akhe kwiEconomic Freedom Flyers (EFF) ngoba akasazi ukuthi athatheni ahlanganise nani.
Sesikhuluma iqiniso, kuzoyisiza ne-EFF lokho, phela uyaphuma uMengameli Jacob Zuma maduze nje esikhundleni - ngabe inyanga yakhe nguProfessor Severus Snape ongomunye wothisha bakaHarry Porter.
Uma engahlala kuze kushaye unyaka wezi-2019 - izojikijela bani ngamagabadi ephalamende? Bengiye ngizwe igenge ezidlela amambawu ithi uma uthisha enganika izingane i- test athi: Question 1; Bhala izinto eziyisihlanu eziseqhulwini kwezifunwa yi-EFF, ingane yesishoshosovu seAfrican National Chordless (ANC) esingasebenzi - umsebenzi waso okuwukungena o- door-to-door uma kuza ukhetho bese sibongwa ngama- hot dog abandayo - ithi: (1) Zuma must go, (2) Duduzane’s father must go, (3) uZuma makahambe, (4) Makahambe uZuma, (5) Ubaba kamalum’ Edward must go shona away, makahambe ayoshona.
Ngiyazwelana kakhulu nawe baba Meyiwa. Uyazi umuntu owa- bulala uSenzo sengathi angaqala abole unyawo azitshele ukuthi uphethwe wushukela, agijime odokotela aze abe ngangoPeter Dinklage lo odlala indawo kaTyrion Lannister oyi- dwarf kwiThe Game of Thrones.
Ahambe izinyanga ziyidle imali yakhe aze akhale ngekhwela kuhle kwendoda ephethwe yisifo samadoda iwela ugwaqo omkhulu bese kuvula irobhothi iphakathi nawo. Mina-ke kangiyifisi into ingenzeki - wukuthi nje phela kangihambi ngifisa izinto eziwubuwula - umuntu owabulala uSenzo sengathi angabhala ingoma yekwaito ayicule nge- reggae ayinike isihloko esithi: “Jah I man Ubhodis’ uMsenzos”.
Ngiyazi izinqumo zomuntu omdala kazilokhu zicokofulwa yizingane, kodwa-ke nenkosi iyahletshwa, sesihleba nje, wena baba omdala oseZulwini uthule uthini kudlalwa ngekhehla lakwaMeyiwa?
Cha Nkosi usucelwa yimina-ke manje, sicela ukubona umbulali kaSenzo, uma wena ufuna ukuba neutral kulolu daba, yekela yena umufi apokele lo muntu azikhulumele iqiniso.
Ngicela nokuyala uyise kaSenzoke, uyabona baba Meyiwa ulucele ubheke usizo losopolitiki, hheyi bazokujikela esiswini njengesiqatha, kabaqede kulunga laba bantu.
Awucabange nje abantu abakwazi ukukhohlisa izwe lonke beqamba amanga aluhlaza cwe njengejezi lamaZulu FC bethi mabavotelwe ukuze bakwazi ukunika abantu abahluphekayo izidingo - iqiniso la wukuthi abantu mabavotelwe ukuze kufezeke izidingo zabo zokudla imali.
Thina-ke uma bona bedla imali sisala nemvuthu bese belokhu bekhomba izindlela zesiZulu ezibheke emfuleni eMhlahleni ngasensimini kamalumekazi uMaXulu, unina kaChogwane, bethi: “Lonake wuRiot Mkhwanazi Pathway, wakhiwe yithina.”
Bakwethu, ake kuboshwe abantu ababulala uSenzo ukuze ikhehla lithole ukuthula emoyeni walo, kungenjalo uNkulunkulu angiboleke isikhiye sasesihogweni anginike ne- map ebheke khona ngifike ngivulele amadimoni amathathu asafuna isipiliyoni sokuhlukumeza abantu, ayokhombisa ikheli lababulali nalaba bantu abaqube neqiniso.
Sizophela phela ngabantu abahamba benza amacala la bese becasha ngemali, bakhokhele abathile ukuze kube sengathi umuntu akabulawanga, kuvele kwasuka amabhubesi nje enza ngaye i- braai kune- birthday party yelinye lawo.
Uma sebesikhohlisa la sebefuna ukufeza izinhloso zabo zokungcola, bakhumbuza thina bethi “votelani iqembu labantu abamnyama ngoba nibamnyama…”
Le fellow-blackish solidarity isebenza kuphela uma kufanele isize abantu abadumile, ikakhulukazi osopolitiki. Ngeke sivume.
#Nkulunkulu nika amadimoni amathathu ithuba lokuphenduka ngokuba adile nababulali, ikakhulukazi abakaSenzo Meyiwa.
Hikhensile ngopfu ma-Afrika! mkhekhelezi@webmail.co.za