UHLOKOLOZE IZINYOSI UMENGAMELI WASE-USA
UZIGXOBE ngetshe kwandawo uMengameli wase-United States of America (USA), uMnu Donald Trump, ngenkulumo yakhe evuse uhlevane yokuthi uncamela ukuba nenqwaba yezifikanathwalo zaseNorway hhayi ezaseHaiti nezasemazweni axathukayo ase-Afrika.
Amanxusa amazwe ase-Afrika kwi-United Nations (UN), abhodla umlilo okwenkanyamba ngale nkulumo ayichaza njengewubulima futhi enenhlese yokucwasa ngokwebala, afuna ukuba uMnu Trump axolise.
UNkk Samantha Power-Sunstein oke waba yinxusa lase-USA kwi-UN kusaphethe uMnu Barack Obama, unanele isikhalo samanxusa aseAfrika.
“Kangikaze ngiyizwe inkulumo enjena ivela emazweni ase-Afrika ibhekiswe kwi-USA,” kusho yena. UMnu Trump uyaphika ukuthi usebenzise amagama ahlabayo ewabhekise emazweni ase-Afrika nakubantu baseHaiti - okudabuka khona isilomo somculi ongumlingisi, uWyclef Jean.
Nokho kwi- twitter uvumile ukuthi uke wasebenzisa amazwi asindayo ngesikhathi kunezingxoxo nabashayimthetho ekomkhulu likahulumeni wase-USA, iWhite House ngo- Lwesine olwedlule mayelana nomtheshwana othinta abantu bangaphandle kwakuleliya lizwe, i- Immigration Bill.
USenator Dick Durbin okuyilona lodwa ilungu leDemocratic Party ebelikhona kulo mhlangano, lithi impela uMnu Trump uwakhulumile ama-ganyana ayiziswana, abegcwele inzondo nokucwasa ngokwebala.
Ezeqembu likaMnu Trump, iRepublican Party -ebezikhona kulo mhlangano wangoLwesine - zivele zahuba elinye ihubo mayelana nalolu daba.
USenator Tom Cotton waseKansas City noSen. David Perdue wase- Georgia, bakhiphe isitatimende ngokubambisana bethi kabakhumbuli nakancane uMnu Trump ephimisa amazwi ahlabayo ngeAfrika neHaiti.
Amanxusa amazwe ase-Afrika athe akhathazekile ngokuqhubeka komkhuba kahulumeni wase-USA wokushobingela emakhanda abantu abangabokudabuka e-Afrika.
Impikiswano eWhite House ibisuke emuva kokuthi kube nombono wokuthi kungeze kwabakuhle yini ukuthi abantu base-El Salvador, abaseHaiti nabasemazweni aseAfrika bafakwe ngaphansi kweimmigration bill.