Ucwaningo ngetshe lakomunye umhlaba
ABACWANINGI ababili base-University of Johannesburg (UJ), eGoli, bamatasatasa bazama ukuthola ukuthi itshe elitholakale e-Egypt livelaphi njengoba kuthiwa likhombisa ukuthi kakulona elakulesi simonkanyezi selanga ( solar system).
USolwazi Jan Kramers noDkt Georgy Belyanin bePaleoproterozoic Mineralization (PPM) Research Centre, e-UJ, bamemezele ngonyaka wezi-2013 ukuthi leli tshe elibizwa ngeHypatia, kakulona elakulo mhlaba.
Liqanjwe ngoHypatia Alexandria owaba ngomunye wabesifazane bokuqala ukufunda iMaths, i- Astronomy nePhilosophy.
Kuleli litshe abacwaningi bathole imfusimaphahla ( chemical compound) engekho kwizakhiwomkhathi ( celestial bodies) ezisesimenikanyezi selanga - okubalwa kuzona imihlaba, imihlabambu-mbulu ( dwarf planets) oshiyamsila ( comets), izingamhlaba ( asteroids) nezimbumbulu ( meteorite).
“Esikwaziyo nje, wukuthi uHypatia wakheke endaweni ebandayo, cishe enamazinga okushisa angaphansi ngisho kwawe- nitrogen ewuketshezi (-196˚C), etholakala emhlabeni,” kusho uSolwazi Kramers.
Lo solwazi osanda kuhlonishwa yiNational Reasearch Foundation njengomcwaningi ohamba phambili emhlabeni, uthi umsebenzi obahlalele wukuthola ukuthi leli litshe livela kusiphi isimonkanyezi futhi kungenzeka yini ukuthi imfusimaphahla etholakala kulona isize ekutholeni lapho liqhakuma khona.
Njengoba labo solwazi sebazi ukuthi leli litshe kakulona elakulesi simonkanyezi, kuyacaca ukuthi kuyomele baqale ezimweninkanyezi ezakhelene nelanga, okuyiProxima Centauri (esebange-ni elilinganiselwa e-4.25 light years - 40.2 trillion km), Bernard’s Star (5.9 l/y - 50 trillion km) neLuhman AB (6.5 l/y - 61.7 trillion km).