IJAMELENE PHAKATHI KUKAHULUMENI WASE-DRC NAMAKHATHOLIKA
IJAMELENE phakathi kukahulumeni waseDemocratic Republic of Congo (DRC) neBandla lamaRoma aKhatholisa kuleliya lizwe emuva kokuba kushone abantu abayisi-6 ngesikhathi kunemashi yokuba uMengameli Joseph Kabila ehle esikhundleni, ebingoNcibijane.
NgoLwesihlanu inqwaba yamaKhatholika ibihlangene ikhumbula abashone kule mashi egcine inezidubedube. Kulesi sikhumbuzo buhlatshwe bahlikizwa ubuholi bukaMengameli Kabila.
Kuze kufa abantu nje, amaphoyisa adubule amahlandla ambalwa exwayisa ababhikishi kule mashi ebiholwa nguCardinal Laurent Monsengwo - ovele uyaziwa ukuthi akafuni nakuwubona uhulumeni kaMengameli Kabila.
NgoLwesihlanu abaholi bamaKhatholika - abebehambisana namanxusa akwamanye amazwe asentshonalanga - bebethi maziye ngamagama enkehli phela, uMengameli Kabila ahambisane nesi- vumelwano asenze naleli bandla ngowezi-2016, okuvela ukuthi besingaholela ekubeni kube nokhetho lukazwelonke ngokuphela konyaka odlule.
Amanxusa abekhona ngawaseBelgium, eBritain, eCanada, eFrance, eNetherlands naseSweden kanti bekukhona nabamele i-United States of America (USA), i-European Union neVatican City, okuyikhaya lamaKhatholika eliseRome, e-Italy.
UMengameli Kabila - okumanje uneminyaka engama-46 ubudala - useqhoqhobale lesi sikhundla kusukela ngonyaka wezi-2001. Uhulumeni wakhe kuthiwa uhlaselwe yinkohlakalo, wukuphoqa abantu ngezinto ezahlukene nokuhlulwake nje wumsebenzi.
Isikhathi sakhe njengomengameli siphele ngoZibandlela (December) wezi-2016 kodwa waqhubeka wahlala - okuyinto eholele ekubeni kube nodlame. Ngokwesivumelwano namaKhatholika, uvunyelwe ukuhlala esikhundleni inqobo nje uma kuzoba nokhetho ngowezi-2017, osekuwumlando ukuthi usufike wadlula.
Uhulumeni ubeke izaba wathi kube nezinkinga, okuphoqe ukuba ukhetho luhlehle umhla zingama-23 kuZibandlela nonyaka - okuyinto okuthiwa inenge kakhulu amazwe asentshonalanga.
Okhulumela ababhishobhi bamaKhatholika eDRC, uFata Donatien Ntshole, ngoLwesihlanu uthe kumele amaKhatholika alwe ngendlela enokuthula ukunqanda imizamo yokuthathwa kombuso nge-ndlela ephambene nentando yeningi.
“Njengamanje sibona imikhankaso ehlose ukuphuphuthekisa abantu ngokubanika ulwazi olungekho, eqhutshwa yizinhloko zeminyango kahulumeni ukuze bangawanambithisisi amaKhatholika nabaholi bawo,” kusho uFata Ntshole.