KUSUNGULWA UHLELO LOKUVUNDULULA ONONDWEBA
KUZOSUNGULWA uhlelo lokuthungatha nokuthuthukisa onondweba ngaphansi kweSouth African Football Association (Safa) uThukela Region ekhethe ubuholi obusha ngoMgqibelo eMnambithi.
Lokhu kutshelwe ILANGA nguThemba Phiri obuyiselwe esikhundleni sokwengamela lesi sifunda.
Uthi bazoqhubeka nezingxoxo ebebevele benazo nezinkampani ezahlukene ukuxhasa imiqhudelwano yalesi sifunda.
UPhiri uthi bazokwenza konke okusemandleni ukuqinisa ubudlelwano nomasipala abangaphansi kwesifunda uThukela ngenhloso yokuthi kuthuthukiswe ibhola.
“Into emqoka kakhulu wukwandisa onompempe.
"Sishoda kakhulu ngabo kulesi sifunda. Okuhle ukuthi bonke abaholi bahuba ingoma eyodwa yobumbano.
"Sonke sifuna ukubona ibhola lithuthuka kulesi sifunda. Sibonile ukuthi le nto yokuklwebhana nokuhlebana kayisiyisi ndawo.
"NgoMgqibelo isifunda sithathe ngokusemthethweni isinqumo sokweseka uDanny Jordaan ekutheni abuyele njengomengameli weSafa njengoba kuza ukhetho.
"Kuningi okuhle akwenzile, kanti siyakholwa wukuthi kumele anikwe ithuba lokuphothula umsebenzi asewuqalile,” kusho uPhiri ophinde abe yisekela likaThami Mchunu ongumengameli weKwaZulu-Natal Sports Confederation.
UPhiri uthi ukulungele ukukhethelwa ebuholini besifundazwe uma kukhona izifunda eziphakamisa igama lakhe. Isifundazwe kumele sikhethe ubuholi obusha ngaphambi kokuthi kukhethwe obeSafa kuzwelonke mhla zingama-24 kuNdasa (March) kophezulu.