UZOLWELA IBHANDE LE-IBF UBIYELA
ULANGAZELELE ukungena eqenjini leNingizimu Afrika lamaCommonwealth Game uThobani Chagwe okuzokuthi mhla zili-10 kuNhlolanja (February) agijime i-Access Lagos Bank City Marathon eNigeria.
UChagwe ongowokuzalwa eBulwer uzakhele ugazi kwezokugijima ngowezi-2014 edla umhlanganiso kwiMandela Day Marathon eqopha isikhathi esingu-2:27 namanje esisekhona.
Ekhuluma neLANGA uChagwe ukuqinisekisile ukuthi uzoyobamba iqhaza emjahweni waseNigeria ophethe isamba sika-50 000 US Dollars esizotholwa izingqwele ngokuhlukana kobulili. UChagwe utshele leli phephandaba ukuthi ithuba lokuyogijima eNigeria ulihlanganiselwe yimenenja yekilabhu yakhe uMartin Ngwenya weMaxed Elite.
“Nginovalo ngenxa yokuthi umjaho engiya kuwona umzila wawo uqonde kakhulu lokho kudinga ube fithi. Indawo eqondile iyagqilaza kwazise idinga wonke amandla uze uyoqeda. Inkinga enginayo wukuthi kangikwejwayele ukugijima emzileni ofuze lona. Nokho ngizilungiselele ngok- wanele. Ngizimisele ukwenza kangcono isikhathi sami esingu-2:27 engisibeke kwiMandela ngenze noma u-2:15 ukuze ngithole ithuba lokungena eqenjini leNingizimu Afrika eliya kumaCommonwealth Game ngoMbasa (April) eGold Coast, e-Australia. Ngiyazi ukuthi kuzokuba nzima ukungena eqenjini lesizwe kwazise baningi abasubathi abakulangazelele ukuyomela izwe.
“Unyaka odlule kawubanga muhle kimina, yonke imijaho ebengihlele ukuyigijima izinto kazihambanga kahle. Nonyaka kuzofanele ngilungise amaphutha. Uma ngihlulekile ukungena eqenjini lesizwe ngizogxila kakhulu kwiSoweto Marathon engoLwezi (November) eGoli, neminye imijaho yesifundazwe ikakhulukazi iCross Country neTrack and Field ukwakha isivinini,” kusho uChagwe owenza unyaka wesithathu kwiTechnical Financial Accounting eDurban University of Technology (DUT) eMgungundlovu.
Lo msubathi kulindeleke ukuba alifulathele leli mhla ziyisikhombisa kwezothwasa kanti utshele leli phephandaba ukuthi wonke amaphepha okuhamba usewalungisile. UKHALE ngesipiliyoni seNigeria umqeqeshi weqembu lesizwe lakuleli lika-U/20 iBasetsana lihlulwa ngo-2-0 yileli lizwe ngoMgqibelo ntambama ePeter Moka Stadium, ePolokwane kowokuhlungela ukungena kwiNdebe yoMhlaba ngoNcwaba (August) eFrance.
Umzuliswano wesibili uzokuba semasontweni amabili ezayo eNigeria.
UMaud Khumalo ocija iBasetsana utshele ILANGA ukuthi usethembe indlela abadlale ngayo ngesiwombe sesibili.
Uthi kuzofanele bahlanganise amakhanda baqhamuke nesu lokuhlula iNigeria ekuhambeni.
“Basishaye ngoba banabadlali abanesipiliyoni uma ubaqhathanisa nabethu.
Kuzofanele sizilungiselele kahle uma sesibhekisa amabombo eNigeria.
Okubi wukuthi sivumele bashaye amagoli amabili ekuhambeni okwenza sibhekane nomqansa emdlalweni olandelayo,” kusho uKhumalo othwalise kanzima izintatheli ngemuva komdlalo kwazise imimoya ibiphezulu. UZOBHEKISA amabombo eNamibia uNkosinathi Biyela ohlelelwe impi ye-International Boxing Federation (IBF) Intercontintal Lightweight noDanny Boy Albinius ngoNdasa (March) kophezulu.
UThulani “Nkunzi” Magudulela weLudonga Boxing Promotions ehlela izimpi zikaBiyela, ubambe izingxoxo nophromotha waseNamibia eGoli ukuphothula izinhlelo zale mpi.
Leli bhokisa lasoNdini bekumele liyokulwa eNamibia ngenyanga edlule, kodwa yagcina ibhuntshile impi.
UBiyela okhula ngesivinini kulo mdlalo, unezimpi eziyisithupha kuphela esigabeni esikhokhelayo. Usazinqobe zonke izimpi asezilwile kulesi sigaba.
“UBiyela sihlela ukuthi aqale manje ukulwela emazweni angaphandle. Uma ebuya eNamibia sizomzamela enye impi kwelinye izwe. Makhulu amathuba okuthi aphathe amabhande ahlonishwayo emhlabeni.
Amabhokisa ethu sizama ukuthi alwele ngaphandle ngoba kuyabiza ukuhlela izimpi lapha eNingizimu Afrika,” kusho uMagudulela.