Usebheke eleBafana owePirates
UNOZINTI we-Orlando Pirates okhombisa ukubuyelwa yifomu kulezi zinsuku ulubalubela ijezi leqembu lesizwe lakuleli iBafana Bafana.
IBucs iqumbe phansi iMamelodi Sundowns iyiguqisa ngo-3-1 koweAbsa Premiership ngoMgqibelo ntambama eLoftus Stadium, eTshwane.
Amagoli eBucs aqatshuliswe inethi ngoNtsikelelo Nyauza, Mpho Makola noLuvuyo Memela, eleDowns lashaywa nguPercy Tau.
UJackson Mabokgwane uqokwe njengomdlali ovelele kulo mdlalo njengoba evimbe amabhola anzima.
Lo mdlali uthi ulubalubela ijezi leBafana osekunesikhathi eside aligcina.
“Angikaze ngiliphonse ithawula ngokudlalela iBafana Bafana.
"Ngesikhathi ngijoyina iPirates kumasizini amabili edlule bengazi ukuthi kuzoba nzima ukuthola ijezi kodwa manje sengilithathile kufanele ngilibambe ngezandla zombili ngoba ngihlose ukubuyela kwiBafana.
"Ngizokulwela lokho ngizoqhubeka nokudlala ngokuzinikela,” kusho uMabokgwane.
Ube eseluleka ozakwabo emuva kokuba benqobe lo mdlalo benganikwa lutho.
“Siye kulo mdlalo singezona izimfivilithi kodwa sawunqoba ngenxa yokuzinikela.
"Silwile bekunzima kwagcina thina.
"Kodwa-ke iseyinde indlela akufanele sehlise izinga ngoba nakho sesihlule iSundowns lokhu esikwenze kulo mdlalo kufanele sikwenze nakwamanye amakilabhu singabheki igama,” kusho uMabokgwane.
Nokho uPitso “Jingles” Mosimane ocija iDowns ukugxekile ukuqokwa kwalo nozinti njengomdlali ovelele.
“Ngokwami umdlali obevelele nguMemela angazi ukuthi uqokwe kanjani uMabokgwane ngoba ubelokhu ezilalisa nje emosha isikhathi.
"Ngiyafisa ukwazi ukuthi kwaSuperSport bamkhetha kanjani umdlali ovelele ngoba uMabokgwane bekungamfanele ukuthola lo mklomelo,” kusho uMosimane.