UCASHA NGESITHUPHA UMQEQESHI WE-DOWNS
UCASHE ngesithupha umqeqeshi weMamelodi Sundowns uPitso “Jingles” Mosimane ezakhe zinenebulwa ngo-3-1 kowe-Absa Premiership ngoMgqibelo ntambama eLoftus Stadium, eTshwane.
Amagoli okunqobe ngawo iBucs abekwe enethini ngoNtsikelelo Nyauza, Mpho Makola noLuvuyo Memela, kwathi eleDowns lokubika ekhaya lona lashaywa nguPercy Tau.
IDowns iye kulo mdlalo ithishwa ukukhala yemuke namaphuzu amathathu.
Isizathu salokho wukuthi isivamise ukuzicoboshisela kwiPirates.
Nokho ligaye ngomunye umhlathi kulo mdlalo iBucs iyijikela esiswini njengotshwala.
UMosimane ucashe ngesithupha ezakhe zihlulwa.
“Umdlalo ubuseqophelweni eliphezulu ube yilento abantu abebeyilindele.
"Ukube besibe nethuba elanele lokuphumula besingeke sihlulwe kanjena iPirates ibe nesikhathi esanele sokuphumula uma uyiqhathanisa nathi njengoba ibingenamdlalo phakathi neviki eledlule kanti thina sidlalile,” kusho uMosimane.
Uthi ezakhe bekufanele ziwunqobe lo mdlalo.
“Sakhe amathuba angcono kunePirates kulo mdlalo sangawasebenzisa.
"Ngaphandle kwalokho negoli layo lesibili ilinikwe yithina senze iphutha yalisebenzisa.
"Kodwa-ke angikhali kangako kusazoshuba njengoba sezibheke entanjeni,” kusho uMosimane.
Leli phephandaba lishicilele izikhulu zeDowns nezeSuperSport zivalelene emhlanganweni obuyizolo ngeSonto kusihlwa ngodaba lokudayiselana ngoJeremy Brockie osemabhukwini eSuperSport.
Uma kugcine kuvunyelwene kulo mhlangano kungenzeka kushone elanamuhla ngoMsombuluko esemenyezelwe njengomdlali weDowns.
UBrockie ubengekho ohlwini lwabadlali beSuperSport ebibhekene neLamontville Golden Arrows izolo ngeSonto ntambama ePrincess Magogo Stadium, KwaMashu.
Ubenikwe ikhefu ngenxa yalokhu kudayiselana okuqhubekayo.