Ingase ilahlekelwe umqeqeshi iBucs
Uzingelwa ngamakibhu ase-Egypt
I-ORLANDO Pirates isengcupheni yokulahlekelwa ngumqeqeshi njengoba kuvela ukuthi kunamakilabhu amfunayo ngaphandle kwelakuleli. IBucs iguqise ngo-3-1 iMamelodi Sundowns kowe-Absa Premiership ngoMgqibelo ntambama eLoftus Stadium, eTshwane.
Amagoli eBucs abekwe enethini ngoNtsikelelo Nyauza, Mpho Makola noLuvuyo Memela, kwathi eleBucs lona lashaywa nguPercy Tau.
Leli phephandaba lihletshelwe ngenye i-agent yabadlali enobudlelwano namakilabhu ase-Egypt kodwa engeyokuzalwa eNigeria ukuthi iBucs kungenzeka ilahlekelwe ngumqeqeshi njengoba kunamakilabhu amabili ase-Egypt ayithume ukuba ibahlanganisele uMilutin “Micho” Sredojevic ocija iBucs.
Ithi ibingakahlangani noSredojevic ibisahlele ukubonana nomphathi wakhe.
“Njengoba ngikuleli nje ngizohlala amasonto amabili nje vo bese ngiphindela e-Egypt ngoba ngizinze khona.
"Ngithunywe yiZamalek neProject okungamakilabhu ase-Egypt adonsa kanzima kulezi zinsuku.
"Afuna ngizowazwela ukuthi angamthola yini uSredojevic.
"Okwamanje kuseyisimo esinjalo ukuthi kuzogcina kanjani angikakazi.
"Kodwa wona abeka imali eningi ngamaDollar ase-United State of America engingakholwa ukuthi uzoyinqaba. Empeleni afuna ukumthenga kwiPirates ngoba ayawazi amagalelo akhe ebholeni laseAfrika.
"Engifuna ukukubeka kucace wukuthi konke kuzokwenzeka ngezibusiso zikaIrvin Khoza usihlalo weBucs.
"UKhoza uyahlonishwa e-Egypt empeleni e-Afrika yonkana bayamazi ukuthi unamandla njengoba ebuye ehlale emihlanganweni yeFifa yingakho bengeke bamuhambe ngemuva ngomqeqeshi wakhe bamusaba kabi futhi bayamhlonipha.
"Bakhona-ke nabadlali engizobaqalaza engingeke ngibasho okwamanje ngoba ngisaxoxa nama-agent abo,” kusho le agent ecele ukuba lingadalulwa igama layo ngenxa yezizathu ezibekele leli phephandaba.
USredojevic uthi usazinikele emsebenzini wakhe futhi ufuna ukunqoba izicoco neBucs.
Uthi uhlose ukubuyisa izinsuku zenjabulo kubalandeli beBucs.
Uthi umdlalo weSundowns bekufanele bawunqobe basebenze ngokuzikhandla.
“Le wini ngifuna ukuyibhekisa kubalandeli bethu.
"Sekunesikhathi eside singabajabulisi ngakho-ke lena ngeyabo.
"Sibe nomdlalo omuhle sasheshe sacacisa ukuthi sifuna ukuwunqoba.
"Kodwa kuningi okusafanele sikulungise, angikagculiseki,” kusho uSredojevic.