OSOLWA NGOKUFA KUKAYISE ENKANTOLO

LIZONGENA mhla zingama-23 kwephezulu icala lokubulawa kukasomabhizinisi waseCreighton, eningizimu yeKwaZulu-Natal okuboshwe indodana yakhe “nezinkabi” ezimbili ngokufa kwakhe.

NgoMsombuluko ILANGA libike udaba lokubulawa kukaMnu Mmeli “Masidu” Kheswa, isidumbu sakhe esitholakale emotweni yakhe, eNhlamvini, eMkhomazi, emuva kokuhamba kwakhe eyohlangana nendodana yakhe ngoLwesine olwedlule.

Kuboshwe uMnu Khanyisani Kheswa (25) - oyindodana kaMnu Kheswa, nguMnu Mduduzi Mbokazi (28) noMnu Chayiye Mwandana (33). Bavele Nkantolo yeMantshi yaseXobho ngoMsombuluko icala lahlehla ukuze bayofaka isicelo sebheyili.

Kuthiwa indodana kaMnu Kheswa imshayele ucingo yathi mabahlangane ndawana thize kanti uzotholakala entathakusa yangoLwesihlanu esephangalele. Kuthiwa isolwa ngokuqasha uMnu Mbokazi noMnu Mwandana ukuba balalele uyise unyendle. Kubikwa ukuthi yiyona indodana ekhombe laba ababili njengoba bekhalelwe ngamasongo kaSigonyela sebeseMgungundlovu emuva kokuba abakwasidlodlo bebapheke ngemibuzo.

Indodana kuvele ukuthi ishaqwe yimbokodo ebomvu emuva kokukhuluma izinto ezingahlangani ithi ishayele uyise ucingo isuka eThekwini kwazise bekufanele imnike u-R 40 000. Kuthiwa ibuye yashintsha yathi ibizomnika u-R60 000. Kube nemibuzo yokuthi kungani iqome ukuyonika uyise le nkece esigangeni, kwazise ibisisondele kubo.

ILANGA lithole ngamanye amalungu omndeni wakwaKheswa ukuthi indodana ibithandwa nguyise kuyiyona kuphela umfana kumfazi kamufi wesibili, kwabathathu abamganile. Kuthiwa uMnu Kheswa ubeyitakula ezikweletini ebizidala.

Umufi ubengusomabhizinisi owaziwayo endaweni njengoba ebenezitolo, amathaveni namatekisi, esezothatha nomhlalaphansi. ILANGA lithole ukuthi besekusele iminyaka embalwa ukuba umufi athathe umhlalaphansi.