KUME IZINHLELO ZOKUFUNDA

KAZIYISHAYI mkhuba eyokuphazamiseka kohlelo lokubhaliswa kwabafundi izisebenzi zaseDurban University of Technology (DUT), ezibeke phansi amathuluzi kusukela ngoMsombuluko zifuna ukwenyuselwa amaholo.

Uhlelo lokubhalisa luphazamisekile, okuholele ekubeni iDUT iyalele abafundi ukuba babhalise ngomyalezinyazi ( online) njengoba isimo singakalungiseki. UNobhala weNational Education and Allied Workers Union (Nehawu) kule nyuvesi, uNkz Mbali Ntoza, uthi kabahlehli, abaphathi bale nyuvesi bazoze bezwe ukuthi bafunani.

Usho lokhu nje, izolo ngoLwesithathu bebehambise uhlu lwezikhalo kumphathi waseDUT, uSolwazi Thandwa Mthembu. Utshele leli phephandaba ukuthi kusukela ngoNhlaba (May) wonyaka ophelile bexoxa ngezindaba zokunyuselwa amaholo kodwa kungavunyelwana.

“USolwazi Mthembu akathandi ukulalela, ubukela phansi umthetho wabasebenzi. Kungenzeka ateleke wonke amanyuvesi ngoba nase-University of KwaZulu-Natal kunezingxoxo ezifana nalezi. Uma kuwukuthi nakhona kakuvunyelwana, okusho ukuthi wonke amanyuvesi ngeke aqhubeke kahle,” kusho uNkz Ntoza.

Ukhuluma kanjena nje, naseUniversity of South Africa (Unisa) izinto ziyabheda, abafundi kolunye uphiko lwayo, kuthiwe mabaphindele emakhaya. Uthi nakuba betsheliwe ukuthi uma bengasebenzanga ngeke bahole, kabanendaba nalokho. Utshele leli phephandaba ukuthi kabagudluki ku-10% abawufunayo, ngeke bawuvume u-4% obekwa yinyuvesi.

Uthi bebengahlosile ukuphazamisa ukubhalisa kwabafundi kodwa bazoteleka kakhulu kunakuqala uma kungavunyelwana.

Encwadini ebhalwe nguMnu Sipho Ngidi, ongumqondisi kwezokuqashwa kule nyuvesi ayibhalele izisebenzi, uthi kasikho isisebenzi esizovunyelwa ukuthatha izinsuku zaso zekhefu ukuchibiyela ezilahlekile ngesikhathi kutelekwa.

Uthi kasikho esivunyelwe ukuthatha ikhefu njengoba kutelekiwe. Abasebenzayo uthi bayalelwe ukuba babike kabili ngosuku kubaphathi babo, basayine phansi ekuseni, okuzoba yisiqiniseko sokuthi basebenzile.

Okhulumela iDUT, uNkz Noxolo Memela, uthe inyuvesi iyaxolisa ngesiphithiphithi.

Unxuse abafundi ukuba babhalise ngomyalezinyazi.

ISITHOMBE: SITHUNYELWE LAPHA uMnu Sifiso Mkhize ekhombisa ukuthi anjani amanzi egcekeni lakwakhe. Ngokusho kwakhe umndeni usuphoqeka ukuhlale ugqoke amadadla uma uhamba egcekeni ngenxa yamanzi.