ITHUBA LOKUBA YIZITATANYISWA KUBALANDELI BE-KINGS
ITHUBA lokuhlala endaweni yezicukuthwane kubalandeli abazothenga amajezi eReal Kings eqhathwe neSuper Eagles emdlalweni weNational First Division (NFD) ozokuba ngoMgqibelo ngo15h30 eSugar Ray Xulu Stadium, eClermont.
UTom Dlamini oyiChief Operations Officer (COO) kwiKings, utshele ILANGA ukuthi bahlele ukuthokozisa abalandeli bale kilabhu ngokubavulela ingqayizivele yethuba lokubuka le kilabhu behlezi endaweni yomtakabani ehlale inokudla okuyiziduli zabasali. Uthi inhloso enkulu yokuhlelela abalandeli lokhu, wukubabonga ngokuwa bevuka nale kilabhu esemgqeni wokulwela ukunyukela kwi-Absa Premiership.
“Sikhuthaza abalandeli ukufika ngobuningi kwazise sibahlelele okuningi okuhle kulo mdlalo wangoMgqibelo. Kuzoqala ngokuthi kubanjwe umhlangano wabalandeli lapho kuzoqokwa khona usihlalo wabo omusha. Amathikithi okungena aseqalile ukutholakala ezitolo zakwaShoprite nakwaCheckers kanti abiza uR20 awabantu abadala, awezingane kube uR10.
“Okunye okumqoka kakhulu wukuthi umlandeli ozothenga ijezi lekilabhu ngo-R250 uzokwazi ukungena ngalo enkundleni bese eyohlala endaweni yezicukuthwane. Sizodedela izingane zesikole ukuba zingene mahhala uma ziphethe into ekhombisayo ukuthi ziyafunda,” kusho uDlamini.
Khonamanjalo, abadlali beRoyal Eagles babopha itulo lokuqumba phansi iRichards Bay FC kowomkhaya weNFD ngoMgqibelo ngo15h30 eHarry Gwala Stadium, eMgungundlovu.
USiyanda Ngubo ongumgadli weEagles, utshele ILANGA ukuthi basophe ukuvuka bazithintithe ngeBay FC abayinike izifundo zebhola zamahhala emzuliswaneni wokuqala. Uthi bayazi ukuthi iBay FC izofika kubona ithelwe ngezibonkolo kwazise ifuna ukubuyisa izinduku. Nokho uthi izofika ekugcineni. Uthi iBay FC izohamba ilambatha.
Isiyonke imidlalo yeNFD engempelasonto imi kanje:NGOMGQIBELO EPrincess Magogo: Uthongathi FC vs Jomo Cosmos 15h30.
EParow Park: Stellenbosch vs Mthatha Bucks 15h30.
EPuma Rugby: Witbank Spurs vs Tshakhuma Tsha Madzivhandila 15h30.
EHarry Gwala: Royal Eagles vs Richards Bay 15h30.
EThohoyandou: Black Leopards vs Cape Town All Stars 15h30.
ESugar Ray Xulu: Real Kings vs Super Eagles 15h30.
KaNyamazane: Mbombela United vs Pretoria University FC 15h30. NGESONTO EParow Park: UBuntu Cape Town vs Highlands Park 15h30.
Sikhuthaza abalandeli ukufika ngobuningi kulo mdlalo...