BAFUNA UMHLABA UNIKEZWE AMAKHOSI
ASEKWA ngamakhosi ase-Eastern Cape amakhosi aKwaZulu-Natal odabeni oluthinta umbiko weHigh Level Panel wokuba kuhlakazwe iNgonyama Trust.
Lokhu kuvezwe yiNkosi Xolile Ndevu, ekhulumela iKumkani Zwelonke Sigcau ( esesithombeni), yesizwe sakwaXhosa engxoxweni abe nayo neLANGA. INkosi Ndevu ithi bazowaseka amakhosi akwaZuluNatal kulolu daba ngoba nabo kabahambisani neze nalo mbiko kwazise uthi umhlaba wamakhosi ngokahulumeni. Uthi ngisho ngabe amakhosi aKwaZulu-Natal anquma ukumasha, nabo bayoba yingxenye yaleyo mashi ngoba nabo ibakhathaza kakhulu indaba yalo mbiko.
“Yize singenaso isigungu esifakana neNgonyama Trust kodwa isiphatha kabi kakhulu indaba yalo mbiko ngoba nathi iyasithinta. Owethu umbono uthi umhlaba mawunikezwe amakhosi kube yiwona abela abantu ngokwezizwe zawo. Siyaweseka amakhosi aKwaZulu-Natal uma eyichitha eyombiko,” kusho yena.
iNkosi yamaQadi uMqoqi Ngcobo, ngesikhathi ikhuluma emhlanganweni wamakhosi wokudingida lolu daba, obuseNkosi Albert Luthuli International Convention Centre (ICC), eThekwini, izolo ngoLwesithathu, ithe kakufanele kubhekwe abamhlophe kuphela uma kukhulunywa ngodaba lokuqolwa komhlaba, kumele kubhekwe nabaseNdiya.
“Mina nje, endaweni yami ngicela ningisize ngoba ngixa-kwe ngamaNdiya, agcwele endaweni yami yonke kuze kuyoshaya eVerulam. Le ndawo kulele kuyona obabamkhulu. Lokhu kukhomba ngokusobala ukuthi kakubona abamhlophe kuphela abathathe umhlaba, nabaseNdiya kumele babhekwe.
"Kuyimanje siyaphoqwa ukuba namatayitela uma unomuzi, okuyinto esingayazi thina. Kuqala ayengekho. Kwakwaziwa ukuthi banamakhosi, ngithi masiyivale indaba yamatayitela ngoba iphilela abaseNdiya nabamhlophe. Basilwisa nje, yingoba bayazi ukuthi indawo yaKwaZuluNatal inomcebo nama-khosi.
"Endaweni yami ngiyikhahlela ngazo zombili indaba yalesi sigungu (High Level Panel)," kusho yena. INkosi yamaQadi icele ukuba amakhosi abambisane, nayo iNgonyama Trust isebenzisane nawo ngoba kumele yazi ukuthi kayinkulu kunamakhosi.
USolwazi Jabulani Maphalala, ongusomlando, ugqugquzele amakhosi ukuba abe yingxenye yemigubho yaKwaZulu.
“Ngibona isimo sisibi embusweni waKwaZulu. Uma kuwuMkhosi weLembe KwaDukuza, amabutho kawasafiki eholwa ngamakhosi awo njengoba kwenzeka mhla kuvulwa isikhumbuzo setshe leLembe kubusa iNgonyama uNyangayezizwe mhla zingama-24 kuMandulo (September) we-1954. Namhlanje kakuqondakali ukuthi abavunule bephethe izihlangu ngabamaphi amakhosi.
"Nasemkhosini wokukhumbula impi yaseSandlwana, kakucaci ukuthi amabutho kaZulu ngawamaphi amakhosi. Yingozi enkulu leyo. Okunye wukuthi umhlaba ubuyiswa kubantu budlabha, kazikho iziphakamiso eziqinile ezivela embizweni yamakhosi esendlunkulu,” kusho yena.