Usazicanasela "ohlahlele" udadewabo
Ucingo uluvula ngezikhathi ezithile abuye aluvale
ILANGA liphinde lathola ngamalungu omphakathi ukuthi umsolwa uthumelele udadewabo omdala umqhafazo emyalela ukuba adayise umuzi kamufi, imali azoyithola lapho ayifakele yena kwi-akhawunti yakhe yasebhange.
Kuthiwa ucingo lwakhe uyaluvula ngezikhathi ezithile abuye aluvale. Imizamo yokuthola udadewabo kamufi, iphunzile, ucingo lwakhe belungangeni.
ILANGA libike kabanzi ngodaba lokubulawa kukaNkz Zoe Buthelezi (49) nendodana yakhe uMthunzi Buthelezi (19). Kulesi sigameko kusolwa umfowabo kaNkz Buthelezi okumanje ugcwele izinkalo. Izidumbu zabafi zitholakele zigqitshwe egcekeni. Isidumbu sikaNkz Buthelezi besihlahlelwe saba yizicucu safakwa kopulasitiki abehlukene.
Esendodana yakhe besinenxeba elilodwa, siboshwe izinyawo. Kusolwa ukuthi laba babulawele indaba yombango wemali njengoba kuthiwa umsolwa ubefuna imali ekhokhwa yiziqashi zikadadewabo ikhokhwe kuyena. Kuthiwa uNkz Buthelezi ubulawa nendodana yakhe nje, ugcine ukubonakala ehleli nomsolwa endlini yakhe.
Kuthiwa sekuhwalele uzwakale ekhala, ememeza omakhelwane ecela ukusizwa kodwa washeshe wathula. Kuthiwa ngemuva kwaleso sigameko, uNkz Buthelezi nendodana yakhe bebengasabonakali, sekubonakala umsolwa endlini yakhe.
Bekuthi uma abantu bembuza ukuthi uphi udadewabo, abatshele ukuthi uthole umsebenzi eMgungundlovu, usethuthile uyohlala khona.
Indodana kamufi yona uthe ithole isikole esisha eNkandla. Ngalo usuku abanyamalale ngalo, kuthiwa umsolwa ubebonakala eqhuba ibhala ebeke izingubo phezu kwalo. Kusolwa ukuthi ubethutha izidumbu eyozigqiba. Umsolwa kuthiwa unikele eziqashini zikadadewabo wayozitshela ukuthi imali yerenti sezizoyikhokha kuyena, umufi ushiye yena ukuba amgadele njengoba eseyohlala eMgungundlovu.
Okhulumela amaphoyisa KwaZulu-Natal, uCapt Nqobile Gwala, uthi amaphoyisa abengakabophi muntu kodwa asathungatha umkhondo womsolwa.