KUXOSHWE IMENENJA NGEZINSOLO ZOKUPHEKWA KWEMIPHUMELA YENHLOLOKHONO
SEKUNGENELELE ubuholi besikhashana be-African National Congress (ANC) KwaZulu-Natal odabeni lwemenenja kaMasipala iDr Nkosazana Dlamini-Zuma, ekhonjwe indlela ngamakhansela.
Isinqumo samakhansela alo masipala sokukhomba indlela uMnu Nkosiyezwe Vezi ( osesithombeni), sisuse olukhulu uthuthuva njengoba sibikwe ezi- nhlakeni ze-ANC esifundeni sayo, iHarry Gwala nasesifundazweni ngoba kunenkolelo yokuthi kunamakhansela amzondayo.
NgoLwesibili olwedlule amakhansela aseDr Nkosazana Dlamini-Zuma abizelwe ehhovisi le-ANC eThekwini ngenhloso yokuba kubhekisiswe lesi sinqumo sawo kwazise uMnu Vezi unezinyanga ezintathu okusamele azisebenze kulo masipala. UMnu Mike Mabuyakhulu, onguSihlalo wobuholi be-ANC besikhashana, ukuqinisekisile ukuthi lolu daba selusezandleni zabo kodwa wathi basazoluxoxa noMnyango wezokuBusa ngokuBambisana KwaZuluNatal ukuze lubhekwe nhlangothi zonke.
“Sazi kahle ukuthi kuke kwaba nenhlolokhono nesikhala semenja kulowa masipala, kwaba nezihibe ezidinga ukuxoxwa nomnyango kuthathwe isinqumo,” kusho uMnu Mabuyakhulu. Uvumile ukuthi uMnu Vezi unegunya lokuqhubeka asebenze kulo masipala izinyanga ezintathu okuzobanika isikhathi sokulungisa le ndaba, bafinyelele esinqumeni ngalesi sikhundla.
ILANGA lingakudalula ukuthi isinqumo ngesikhundla semenenja kulo masipala, sesihlukanise phakathi amakhansela njengoba iMeya, uNkz Ngeneleni Mncwabe noSotswebhu uMnu Mlungisi Zikode, kubikwa ukuthi bafuna uMnu Vezi aqhubeke nomsebenzi wakhe kodwa iPhini leMeya, uMnu Philani Shange noSomlomo, uMnu Mduduzi Banda kabahambisani nalokho. Kuthiwa basola ukuthi imiphumela yenhlolokhono yalesi sikhundla ebingoZibandlela (December) - evune uMnu Vezi - ibiphekiwe ukuze kufezeke izi-nhloso zabathile zezepolitiki.
Bafuna lesi sikhundla sibanjwe nguMnu Joseph Nyide, ophethe umnyango wengqalasizinda kulo masipala. UNkz Mncwabe akatholakalanga ukuba aphawule. UMnu Banda uthembise ukubuyela kuleli phephandaba kodwa kuze kwashaya isikhathi sokuloba engabuyanga.
UMnu Vezi uthe yena unencwadi esuka kuNgqongqoshe wezokuBusa ngokuBambisana KwaZuluNatal (uNkk Nomusa Dube-Ncube) noNkz Mncwabe emgunyazayo ukuqhubeka nokusebenza.
Okhulumela umnyango, uMnu Lennox Mabaso, uthe abakwaziyo wukuthi umnyango wabo usebenza ngomthetho wokuthi kube nezinhlelo eziphuthumayo zokukhangisa isikhala semenenja kamasipala uma isizophelelwa yinkontileka ukuze kungabi negebe uma isihamba.