Usizwe yiLANGA ukubuyela esikoleni
Ubebona esethole amadlelo aluhlaza kwiKaizer Chiefs
KUSIZE ukungenelela kweLANGA ukuze abuyele esikoleni umfundi obesejika nelanga emuva kokulaxaza isikole ezitshela ukuthi usethole amadlelo aluhlaza kwiKaizer Chiefs kanti ushaye eceleni.
ULangelihle Zungu (16) wakwaP eMlazi, ushiye phansi isikole efunda oGwini Comprehensive High School khona Mlazi, ngemuva kokuzwa ukuthi angase agijime esikimini esincane seChiefs. Uficwe yiLANGA ejika nelanga kubo ngoLwesibili ethi izikole zimchithile.
Uthi akabuyelanga ekuqaleni konyaka esikoleni ngenxa yokuthi ubeseGoli ezitshela ukuthi usethole amadlelo aluhlaza kwiziMpofana - okuyisiteketiso seChiefs. “Phakathi nonyaka ophelile kufike "umqeqeshi" ozibiza ngoMhlaba, obehambela izikole zaseMlazi ethatha abafana abancane abanethalente lokudlala ibhola ebathembisa ukuthi uzobafaka emakilabhini amakhulu eGoli.
"Ngibe ngomunye walabo bafana abakhethiwe ukuba siyokwenza inhlolokhono kwiChiefs," kusho yena. Uthi batshelwe nokuthi bazoqhubeka nokufunda behlala ekomkhulu leChiefs, eNaturena. “Ngibuyele ekhaya kuthi mangigxume ngibuye phezulu, ngijabulela ithuba engilitholile kwa- zise ngiyazifela ngebhola, kanti kangazi ukuthi ngishaye eceleni,” kusho yena. Uthi ubetshelwe ukuthi uzoqala ukuziqeqesha neChiefs ngoZibandlela (December) kodwa uMhlaba wabuye wahlehlisa wathi usezoqala ngoMasingana (January).
“Ngifonelwe nguMnu Mhlaba engitshela ukuthi ngiyadingeka kwiChiefs, kumele ngigibele ngiye eGoli mhla zintathu kuMasingana. Nebala umama uhlanganise imali yethikithi neyokudla, eboleka komakhelwane ngoba bese kuphuthuma.
"Ngihambe ekhaya sengazi ukuthi kangisabuyeli esikoleni ebengifunda kusona ngoba besithenjisiwe ukuthi sizofundiswa yiKaizer Chiefs," kusho uLangelihle. Uthi uhlukumezekile ngento emehlele.
Utshele ILANGA ukuthi ufike eGoli nabanye abafana akhethwe nabo, bahlaliswa emqashweni uMnu Mhlaba wabashiya bodwa bengenakho ngisho ukudla - uthembise ukuthi uzobuya.
“Besihleli kulo mqasho silindile ukuthi sizobizwa noma siyoqala ukujima.
"Kuze kwaphela inyanga kwacaca ukuthi umnikazi womuzi ebesihleli kuwona useyakhononda ngokuthi kayikhokhiwe imali yerenti. UMnu Mhlaba ubengasatholakali ocingweni uma simfonela,” kusho uLangelihle.
Uthi bagcine ngokukhishwa kulo muzi ngoba ingakhokhiwe irenti. “Bese singenayo indawo yokuhlala, sesihamba sincikiswa ngabantu ngenxa yokuthi "umqeqeshi" bese singasamtholi. Bekuthi uma efonela abazali bethu abakhohlise athi sihleli kahle, sesiqalile nokujima.
"Kuthe uma sekuzovulwa izikole, wafonela abazali bethu efuna imali, ebatshela ukuthi kunezinto esizidingayo zesikole,” kusho yena.
ULangelihle uthi abanye abazali bebefonelwa betshelwa ukuthi mabafake u-R1 000 abanye u-R2 000.
“Ngigcine ngithatha isinqumo sokuba ngibuyele ekhaya ngoba ngibona ukuthi kayikho le nto esiyihlalele, sinjalo nje kasifundi,” kusho uLangelihle. Uthi ubuyele kubo ngeledlule.
ILANGA likhulume nothishanhloko wesikole wasoGwini, uMnu Vusi Dlamini, okuqinisekisile ukuthi uMhlaba lo uziyele mathupha esikoleni sakhe eyofuna abafana abanethalente ebholeni. Uthi ubengenalo ulwazi lokuthi lo mfundi uhleli ekhaya akafundi.
Kumanje useyafunda kusona lesi sikole ngemuva kokungenelela kweLANGA.
Imizamo yeLANGA yokuthola uMhlaba kayiphumelelanga, ucingo lwakhe beluvaliwe kwaze kwashaya isikhathi sokuloba. UVina Maphosa okhulumela iChiefs, uthe bayazihlangula kulolu daba, kabekho abafana ababalande ezikoleni bebathembisa ukubajoyinisa eziMpofaneni.