Abezimayini bakhala ngoMnu Zwane
Baveza ukuthi kabasajabulile ngaye
KUBUKEKA uMengameli Jacob Zuma noMnu Mosebenzi Zwane ongungqongqoshe wezokumbiwayo, beloywe ngumkhulu oyedwa njengoba bobabili bengasafunwa nalapho benyathele khona ezikhundleni abaziphethe.
Njengoba kulokhu kunemihlangano ehlose ukuchitha umengameli, uMnu Zwane obeyisikhulumi ngoMsombuluko engqungqutheleni yezimayini, i-2018 African Mining Indaba - eqale ngoMsombuluko iphela namuhla ngoLwesine - unuka iqaqa ezinhlanganweni ezisebenza ngezimayini.
Kuthe nje ingakaqali kwakuqala le ngqungquthela, waqalwa nguMnu Roger Baxter oyisikhulu esiphezulu kwiChamber of Mines, othe imikhuba yakhe ingase iwise bhu phansi imboni yezokumbiwayo. Ubekhuluma ngeMining Charter 2017 eyethulwe nguMnu Zwane nyakenye.
NgoLwesibili, kube nguMnu Mxolisi Mgojo ongumengameli weChamber of Mines futhi oyisikhulu esiphezulu kwa-Exxaro othe kudingeka ukuba kuxoxwe nabaholi (bezepolitiki) abaqotho ukuze isimo esingesihle esibhekene nemboni yezimayini silunge.
Ekhuluma kule ngqungquthela uMnu Mgojo, uthe abantu abadi- ngida ngekusasa lale mboni kumele kube ngabakhathalele iNingizimu Afrika kwazise lokho kuzocacisa ukuthi linjani ikusasa lezezimayini. “Sidinga abaholi abaqotho, abantu abangaphambene nokulunga, abangenzi izinto emakhosombeni,” kusho uMnu Mgojo.
Uthe izinselelo eziqhamuke neMining Charter ngeke zixazululwe yisinqumo somuntu oyedwa - ebhekise kuNgqongqoshe Zwane. Ebuzwa ukuthi ngabe lezi zinselelo zingaxazululeka yini uma uMnu Zwane eshiya njengongqongqoshe, uthe: “Sidinga abantu abaqotho ukudingida izinkinga zezezimayi- ni, abantu abayizwa enhliziyweni le mboni futhi abakhathalele izwe.” Uthe iChamber of Mines kayinawo amandla okuqoka ongqongqoshe - wumsebenzi kamengameli lowo. “Ngeke sitshele uhulumeni ukuba ungathumeli umuntu wawo (ezingxoxweni) futhi ngeke sithi ngeke si- xoxe ngoba nakhu kunomuntu esingamnambithisisi. Kakuthina esiqoka ongqongqoshe kodwa ngeke sakufihla ukuthi ungqongqoshe okhona njengamanje kasijabulile nhlobo ngaye,” kusho yena.
Uthe inhlangano yabo ibixhumana nabanye ongqongqoshe okubalwa kubona owezemali (uMnu Malusi Gigaba), owezemisebenzi (uNkk Mildred Oliphant) nowezohwebo nezimboni (uMnu Rob Davis) - ukuzama ukulungisa izinkinga ezibhekene nezimayini.
Uthi yize bengasho kulabo ngqongqoshe ukuthi kabafuni ukuxoxa noMnu Zwane kodwa ukukhuluma naye eyedwa nje ngeke kulunge.
“Ngeke abe ngumdlali aphinde abe ngunompempe sikhathi sinye. Okuseqhulwini wukuthi sixoxe nabaholi abaqotho, abantu abakhathalele izwe,” kusho uMnu Mgojo. Ethula inkulumo kwiNdaba ngoMsombuluko, uMnu Zwane uthe umnyango womnyango wakhe uvulekile ukuba kuxoxwe ngeMining Charter 2017 kodwa lokho kakusho ukuthi uzovuma yonke into. Uthe selokhu kuqaliwe ukuhle-lwa kweMining Charter ngowezi-2015, iminyango yakhe ibivulekile ukuba abathintekayo babeke uvo lwabo. Olunye ulwazi ngabe: businesstech