Kubuya izikhathi zenjabulo kwiChiefs
Ulanyulelwe wukudedela isibhaxu somlomo uKomphela
KULETHE injabulo kubalandeli beKaizer Chiefs ukubuya kwezilomo zale kilabhu ezibambe iqhaza elikhulu ithela ngehlazo iLamontville Golden Arrows kuba ngu-30 emdlalweni we- last 32 yeNedbank Cup izolo ngeSonto ntambama eFNB Stadium, eNasrec.
Ukubuya kukaRamahlwe “Rama” Mphahlele noBernard Parker kususe umthwalo emahlombe kaSteve “Mphathi” Komphela ololonga iziMpofana.
Laba badlali abebelimele, bebeqala ukudlala kulo nyaka, kanti basebenze kanzima ukudlulisela le kilabhu emzuliswaneni olandelayo.
Amagoli okunqobe ngawo iziMpofana abhakuziswe enethini nguRyan Moon ngomzuzu wama-53, uParker ngowama-81 noJoseph Molangoane ngowama-84. Igoli likaMoon nelikaMolangoane akhandwe nguMphahlele odlale ingcwenga yebhola.
IChiefs kayidlalanga kahle ngesiwombe sokuqala okwenze uKomphela wadedela isibhaxu somlomo kubadlali bakhe ngesikhathi sekhefu. Lokhu kudalulwe ngu-Itumeleng Khune ongunozinti weziMpofana oqokwe njengomdlali ovelele kulo mdlalo. UKhune uvimbe amabhola amabi abethunyelwa yi-Arrows abengaguqula isimo somphumela walo mdlalo ukuba angenile.
I-Arrows yehlelwe yishwa kulo mdlalo kulimala abadlali bayo abamqoka okuphoqe uClinton Larsen ongumqeqeshi wale kilabhu ukwenza izinguquko abengazihlosile.
Kulimale uKudakwashe Mahachi indawo yakhe yathathwa nguNduduzo Sibiya. Kuphinde kwalimala uLehlohonolo Nonyane kwachitshiyelwa ngoRomario Dlamini. ULarsen uthi lokhu kuzihliphizile izinhlelo zakhe njengoba bevele bebaningi abadlali bale kilabhu abasegunjini labaxinekile.
ULarsen uphoqelekile ukubophela uMaximillian Mbaeva ezintini ngemuva kokulimala kukaNkosingiphile Gumede okunguyena ojwayele ukuqala imidlalo. I-Arrows iphinde yachibiyela ngoJusuf Jappie endaweni kaSibusiso Conco obedlala umdlalo wokuqala esigabeni esikhulu.
UKomphela ukhombise ukubalalela abalandeli bale kilabhu abebemgxeka ngokuthi kungani bengayiqali imidlalo uSiphelele Ntshangase noLeonardo Castro abasanda kuthengwa. Kulo mdlalo uqale ngabo kodwa bangenza lokhu abajwayele ukukwenza nxa ebafaka ngesiwombe sesibili.
Uphoqelekile ukukhipha uNtshangase wafaka uHendrick Ekstein endaweni yakhe kwathi kwekaCastro wafaka uParker. UKomphela uphinde wafaka uSiphiwe Tshabalala endaweni kaWiseman Meyiwa. Kuthusile ukuhlaliswa kukaSiphiwe Tshabalala ebhentshini kwazise nguyena osejwayele ukuyithwala le kilabhu.
UKomphela uthi i-Arrows ibibahlelele kahle kulo mdlalo futhi kubonakala ukuthi iphumule isikhathi esanele.
ULarsen ubalisa ngabadlali bakhe abanebhadi lokuhlaselwa wukulimala. UWillard Katsande weChiefs naye kuphele umdlalo esengaphandle njengoba ebephuma igazi ngamakhala. Lokhu kwenzeke iChiefs isiwuqedile uphawini wokushintsha. Nokho isizwe wukuthi lokhu kwenzeke sekusele amanenjana kusongwe lo mdlalo.
Imiphumela yemidlalo eseyigijinyiwe yeNedbank Cup Last 32 imi kanje: Celtic (1) 5, SuperSport (1) 4; Mariveni Utd 1, EC Bees 3; Happy Wanderers 0, Royal Eagles 1; Chiefs 3, Arrows 0; Pirates 2, Ajax 0; Steenberg Utd 3, Orbit College 1; Phiva Young Stars 0, Chippa Utd 2; Swallows FC 1, Maritzburg Utd 3; CT All Stars 0, Sundowns 1; Ubuntu 3, Polokwane 2; Wits 0, Cape Town City 1; AmaZulu FC 2 (3), Mthatha Bucks 2 (0).
Umdlalo weSuper Eagles neFree State Stars obekufanele ukugijinywe ngoMgqibelo ebusuku eGoble Park uhlehliselwe uLwesithathu ngo-18h00 enkundleni efanayo.