Lusadingidwa olukamengameli
Lsinqumo sibhekwe namuhla
AKWAZIWA mbhantshi kujiya ngekusasa likaMengameli Jacob Zuma njengoba isigungu esiphezulu se-African National Congress (ANC) sizohlangana emhlanganweni oyisipesheli namhlanje ngoMsombuluko ukudingida udaba lwakhe njengoba kuxabene ubendle eNingizimu Afrika, abantu abaningi bengasamfuni.
Kunemibiko ethi ngoMgqibelo abehlangene amalungu ayisi-6 esigungu esiphezulu se-ANC kodwa ubengekho uMnu Zuma.
Ngempelasonto edlule lesi sigungu esiphezulu sihlanganile nomengameli kodwa wangavuma ukwesula.
UMnu Zuma usenkingeni njengoba esenuka umzondo ngisho nakwamanye amalungu e-ANC. NgoLwesihlanu emhlanganweni we-ANC uthe uzimisele ngokwehla esikhundleni uma kuwukuthi uhulumeni uzobhekana nezindleko zokukhokhela amacala akhe noma ngabe avumbuka esephumile esikhundleni. I-ANC isathule ngalokhu.
Kuzokhumbuleka ukuthi uMengameli Zuma ubevame ukulandelwa ngamacala engakaqokwa esikhundleni sokwengamela izwe ngonyaka wezi-2009.
UMengameli we-ANC, uMnu Cyril Ramaphosa - oseqanjwe elokuthi nguRamapostponer ngenxa yokuhlehla kwemihlangano okumele icacise ngekusa- sa likaMnu Zuma - uthi ukholwa wukuthi ikusasa likamengameli lizocaciswa wumhlangano wesigungu esiphezulu se-ANC emhlanganweni onamhlanje ePretoria.
“Sizibophezele ekuhleleni kabusha izinto zethu, ikakhulukazi ngokuthi umi kuphi umengameli wezwe ngoba abantu bethu bafuna ukubona le nkinga ixazululekile.
“Kubalulekile ukuba lolu daba luphathwe ngendlela efanele ukuze kuqinisekiswe ukuthi okufunwa ngabantu baseNingizimu Afrika yikhona okubekwe phambili. Okuseqhulwini wukuthi sibumbe abantu bethu babe yinto eyodwa,” kusho uMnu Ramaphosa.
NgoLwesithathu olwedlule kuke kwasabalala inkulumo yoMgcinimafa we-ANC, uMnu Paul Mashatile, lapho eveze khona ukuthi umengameli wathi akazimisele ngokwehla esikhundleni futhi uzimisele ngokuyobhekana nevoti lokungathenjwa kwakhe elihlongozwa ngamaqembu aphikisayo.
UMnu Zuma ungene esikhundleni sokuhola izwe kuvalwe amehlo njengoba ephunyule emacaleni amaningi.
Bekuba nemilindelo njalo uma umengameli evela enkantolo.