USOLWA NGOKUCABANGELA ISISU OKAMENGAMELI
USOLWE ngokucabangela isisu sakhe hhayi izwe uNkk Thobeka MadibaZuma - ongenye yamakhosikazi kaMengameli Jacob Zuma - ngenkulumo yakhe esuse imvunge abeyibhale enkundleni yezokuxhumana, i- Instagram.
UMnu Zwakele Mncwango, osanda kuqokelwa ihlandla lesibili ukuhola iDemocratic Alliance (DA) KwaZuluNatal, uthi le nkulumo kaNkk Madiba-Zuma lapho kuthiwa usongele athe balwa nomyeni wakhe, ikhombisa ukucabangela isisu sakhe.
Kule nkulumo ubethi kubalulekile ukuba ungalwi nomuntu ongalwi nawe, waphinde wathi kusazoshuba. Kukhona lapho ethe umyeni wakhe akathathi imiyalelo emazweni asentshonalanga.
Lezi zinkulumo zakhe ziqhamuka ngesikhathi amehlo ethe njo eqenjini elibusayo, i-African National Congress (ANC), njengoba kubikwa ukuthi lisezingxoxweni ezijulile, okuthiwa sezikuvuthondaba mayelana nokudilizwa kukaMengameli Zuma esikhundleni sokwengamela izwe.
Embhalweni wakhe, uNkk MadibaZuma, ubefake isithombe sakhe enomyeni wakhe, behleka kuvele elomhlathi. Uthe uMengameli Zuma uzokuqeda lokhu akuqalile. Lokhu kwethuse abaningi njengoba bekuzwakala sengathi uvubela impi.
Ubekhuluma aze ayithakazele indoda yakhe. UMnu Mncwango uthi inkulumo kaNkk Madiba-Zuma iya- zwakala ukuthi uyabona ukuthi kuzothinteka isizu sakhe uma uMengameli Zuma ekhishwa esikhundleni.
“Kumele sikuqonde ukuthi yena uzibhekela yena nomndeni wakhe kanti kufanele ngabe ubhekelela isizwe sonke. UMsholozi kumele aphume manje esikhundleni ngoba usemoshe kakhulu. Umnotho wakuleli ubheke phansi ngenxa yakhe, isibalo sabantu abasha abangasebenzi siphezulu kakhulu. Ukuqhubeka kwakhe kulesi sikhundla kulibeka engcupheni enkulu izwe,” kusho yena.
Uthi kulula kuNkk Madiba-Zuma ukukhuluma kanje ngoba imali ehambe nomndeni wakwaGupta - okungeyakuleli lizwe - yena uhlomulile kuyona.
“Uma sikhuluma ngezizumbulu zemali ezihambe nomndeni wakwaGupta kuleli, yena akathinteni ngoba umndeni wakhe uhlomule kakhulu kulo mndeni,” kusho yena.
Okhulumela iNkatha Freedom Party (IFP) kuzwelonke, uMnu Joshua Mazibuko, uthe inkulumo kaNkk Madiba-Zuma ibe yishwa elikhulu ukuthi ingakhulunywa ngumuntu okuleli hhovisi akulona - lokuba ngumama wesizwe.
“Njengoba bethathwa njengomama besizwe nje, kukhombisa ukuba budedengu kuyena ukuthi angakhuluma ngale ndlela ngoba kunendlela okumele aziphathe ngayo. Kuyasijabulisa ukuthi umndeni wakwaZuma uyaziqhelelanisa nale nkulo yakhe kodwa-ke kuyoba kuhle ukuthi naye ngoba ukwazile ukubhala lokhu akubhalile, azehlise axolise esizweni ngokukhuluma le nkulumo embi kangaka,” kusho uMnu Mazibuko.
NgoLwesihlanu umndeni wakwaZuma ukhiphe isitatimende uxolisa ngale nkulumo.
Indodana kamengameli, uMnu Edward Zuma - nayo eseke yaphoqeleka ukuxolisa ngezinkulumo zayo ebizibhekise kuMnu Pravin Gordhan obengungqongqoshe wezezimali - iveze ukuthi njengomndeni wakwaZuma baphoxeke kakhulu ngalokhu okushiwo nguNkk Madiba-Zuma.
“Kawekho amazwi esingawasho ukukhombisa ukuphoxeka kwethu,” kusho isitatimende.