USEBUYISELWE KUMATIKULETSHENI UMFUNDI WEDLOZI
KUSIZE ukungenelela kwe
odabeni lomfundi waseNcedomhlophe High School, eMafakatini, eMgungundlovu, obenqatshelwa nguthishanhloko ukuyofunda umatikuletsheni ngoba ebuya ukuyothwasa.
ILANGA libike kabanzi ngodaba lukaSphesihle Mathivha (21) ( osesithombeni) waseHowick, obenqatshelwa nguthi-shanhloko ukuqhubeka nomatikuletsheni emuva kokuba eshiye phakathi umatikuletsheni ngowezi-2016 ehlaselwa wukugula, kwadingeka ukuba ayothwasa.
Uthishanhloko walesi sikole kuthiwa ukhwele wadilika kulo mfundi obehamba nabazali bakhe ngesikhathi beyonxusa ukuba abuyiselwe kumatikuletsheni. ILANGA libikile ngalolu daba emasontweni amabili adlule lapho kuvele ukuthi uthisha- nhloko etshele lo mfundi nabazali bakhe ukuthi ngeke adansele isigingci sedlozi futhi yena ngeke ezwe ngalo ukuthi asiphathe kanjani isikole ngoba kukhala isicathulo sakhe eNcedomhlophe.
Unqabile ukubuyisela lo mfundi kumatikuletsheni wamtshela ukuthi uma esafuna ukufunda uzombuyisela kwa-Grade 11. Kuthiwa ubekhala ngokuthi lo mfundi usehlale isikhathi eside engafundi. USphesihle ushiye isikole ngowezi-2016 ngoNcwaba (August).
Uthwase unyaka wonke wezi2017 waze waphothula ngoLwezi (November). Umfundi uzonele ngokuthi atshele uthishanhloko ukuthi abadala bamtshele ukuthi bamnika unyaka owodwa esesikoleni ngoba badinga abasebenzele.
Kuthiwa uthukuthele wagana unwabu uthishanhloko ethi ngeke atshelwe yidlozi ukuthi asiphathe kanjani isikole sakhe. Kuthiwa kwenzeka lokhu nje, uthisha- nhloko ubevele engayizwa indaba yokuyothwasa kwalo mfundi njengoba kuvele ukuthi ulikhiphe ngembaba ngesikhathi umfundi eshiya phansi ukufunda - elokuthi ukube kuya ngaye, ngabe uyothandazelwa kuphume yonke le nto emhlasele kunokuba ashiye isikole.
ILANGA litshelwe ngamalungu omndeni kaSphesihle abejabulele ukuthi usebuyiselwe kumatikuletsheni nothishanhloko wakhombisa ukuzisola ngendlela akhulume ngayo nomfundi egxeka idlozi lakhe.
UNkz Makhosi Mathivha, ongunina kaSphesihle, uthi bajabule ngesinqumo sikathishanhloko sokubuyisela indodakazi yakhe kumatikuletsheni. Uthi ibikhombisa ukuzimisela nokujabula njengoba ibuyiselwe kuleli kilasi.
Okhulumela uMnyango wezeMfundo KwaZulu-Natal, uMnu Muzi Mahlambi, usincomile isi- nqumo sikathishanhloko. “Siyathemba ukuthi umfundi uzofunda ngokuzimisela kumatikuletsheni wakhe,” kusho uMnu Mahlambi. nomfundo@ilanganews
Uthisha ukhombise ukuzisola ngendlela akhulume ngayo nomfundi.