Banovalo ngokuphepha kwezingane
Lpotozwe uthisha
UNGENE kwelikhulu ihlazo uthisha wesilisa wakwaMgaga High School, kwa-J eMlazi, evulelwa icala lokuhlukumeza ngokocansi umfundi wesilisa wakulesi sikole.
ILANGA lithole ngemithombo yalo ukuthi lo thisha - esingeke simdalule igama lakhe ngoba (akakaboshwa futhi) akakaveli enkantolo - usolwa ngokuhlukumeza ngokocansi lo mfundi engaphakathi emagcekeni esikole. Ngokusho komunye umthombo, lo thisha kuthiwa ubizele lo mfundi egunjini elihlala othisha, okuthe uma efika wangakhuluma lutho wamphosa ulimi emlonyeni wampotoza isitho sakhe sangasese.
Umthombo uthi lo mfundi obethukile, uphume wayobikela abanye othisha ngokwenziwe nguthisha kuyena. Kuthiwa othisha bamthathe ngaleso sikhathi bayomvulisa icala. Omunye umthombo ongaphakathi kulesi sikole, uthi lo thisha ogile umfundi uyaziwa ukuthi akababheki abantu besilisa.
"Uyingozi manje ezinganeni zabafana njengoba eseqala ukubamba zona. Besazi ukuthi uphila le mpilo kodwa besingakaze simcabangele ukuthi angabamba izingane zesikole. Sibona izingane zabafana zingasaphephile kulesi sikole uma kusekhona lo thisha,” kusho umthombo odonse ILANGA ngendlebe ukuba lingawudaluli.
Omunye umthombo, nawo ongaphakathi kulesi sikole, uveze ukuthi uthisha uyalelwe ukuba ahlale ekhaya ngoba kwesatshwa ukuthi angase ahlukunyezwe ngabafundi kwazise lolu daba selugcwele isikole sonke.
“Uthishanhloko uzamile ukubiza umhlangano nomzali wengane ukuze bakhulume ngalolu daba, kodwa ubhodla umlilo akazimisele nanokukhuluma naye. Udaba selubikwe kubahloli ukuba nabo bangenele," kusho umthombo.
Okhulumela amaphoyisa Kwazulu-Natal, uCol Thembeka Mbhele, uthe likhona icala elivuliwe esiteshini samaphoyisa eBhekithemba lokuhlukunyezwa komfundi ngokocansi. Uthi amaphoyisa asenza uphenyo, bekungakaboshwa muntu. Okhulumela uMnyango wezeMfundo KwaZulu-Natal, uMnu Sihle Mlotshwa, uthe bebengakezwa ngalolu daba.
"Othisha bafana nabazali icala elinjengaleli (okusolwa ngalo lo thisha) liyamxoshisa uthisha emsebenzini. Sizongenelela siphenye kabanzi ngalulo daba, sithole ukuthi lwenzeke kanjani," kusho uMnu Mlotshwa.
Uyingozi manje ezinganeni zabafana ezifunda kulesi sikole lo thisha.