UZIMISELE UKWANDISA ABAMNYAMA EMKHAKHENI AKUWONA
UZIMISELE ngokushintsha impilo yabantu udokotela wokuqala oseyi- nuclear physician, waKwaZulu-Natal futhi ofunde kulesi sifundazwe.
Lo dokotela onguDkt Philani Alphonse Msomi (31) ongowokuzalwa eMlazi, ungowokuqala omnyama ukuthola iziqu kulo mkhakha ( nuclear physician), e-University of KwaZulu-Natal (UKZN). Usebenzela eNkosi Albert Luthuli Central Hospital, eCato Manor, eThekwini.
Phakathi kwezinto azenzayo wukuhlola nokwelapha izifo eziphathelene nenhliziyo, izinso nomdlavuza walo lonke uhlobo. Uthi isiguli uma sifika kuyena siphethwe wumdlavuza, usijova ngomjovo ohambisana nomshini awusebenzisayo obizwa ngeRadioisotopes.
“Uma sengisijovile isiguli, ngisondeza umshini eduze kwaleyo ndawo yesiguli esiyihlolayo. Uma kuyinhliziyo ngiwubeka ngasenhliziyweni bese uyasho ukuthi yini le eyinkinga kulowo muntu. Uma sengitholile ukuthi inkinga ikuphi, ngibhala ukuthi lowo muntu angelashwa ngayiphi indlela. Isiguli uma kufanele sihlinzwe ngodokotela, bafike babheke ukuthi yini le okufanele bayihlinze, ikuphi futhi ingakanani,” kusho uDkt Msomi.
Utshele ILANGA ukuthi ukuze umuntu abe yi- nuclear physician, kumele aqale abe ngudokotela ojwayelekile, afunde iminyaka eyisi-6 bese kuthi ngowesi-7 ayosebenzela umphakathi engaphansi kwesibhedlela asuke eqokwe ukuba ayowusebenzela khona (umphakathi).
Emuva kwalokho ubuyela esikoleni eyofundela ukuba ngungoti, okuthatha iminyaka emine. Isiyonke iminyaka ayifundile ukuze abizwe nge- nuclear physician, ili-10. Uthi bekungelula ukungena kulo mkhakha njengoba bengebaningi abamnyama abawenzayo. “Lapha KwaZuluNatal ingaka nje, ngingowesithathu kuma- nuclear physician amnyama ezibhedlela zikahulumeni.
"Uma umnyama uzokwenza umkhakha onjengalo, kumele uqine ukhakhayi ngoba nothisha bayakunakisisa ngoba basuke bebona sengathi usendaweni engakufanele futhi belindele ukuthi wehluleke,” kusho yena.
Uthi njengoba esefundile wazithola iziqu, okubalulekile kuyena wukuthi asize abanye abafuna ukungena kulo mkhakha ukuze bande ongoti kwazise mningi umsebenzi kanti abantu abawenzayo bancane. Ugqugquzela abafundi abasezikoleni abafuna ukungena kulo mkhakha ukuba bazimisele ezifundweni zabo baphase kahle iMaths, iPhysical Science ne-English ezikoleni zamabanga aphezulu.
Utshele ILANGA ukuthi ukuzalwa ngabazali abayikhuthalele imfundo, kumsizile njengoba naye ekhule efuna ukusebenza kahle njengabo. Uzalwa nguMnu Eugene Msomi ongasekho obeyisikhulu emaphoyiseni kaMasipala weTheku kanti unina ungumhlengikazi esibhedlela iMcCord, eThekwini.