ULALE EBALIWE ODUBULE WABULALA IZELAMANI
ULALE ebaliwe owesilisa osolwa ngokudubula abulale isinqamathe sakhe nomlamu wakhe eRichmond Farm, entshonalanga yeTheku, maqede washaya utshani.
Umsolwa - esiligodlile igama lakhe aze avele enkantolo - ukhalelwe ngamasongo kaSigonyela ezintathakusa zangoLwesihlanu ehuqa ubuthongo emqashweni abesehlala kuwona eNewlands East, enyakatho yeTheku.
Kuthiwa mhla ziyisi-8 kuMfumfu (October) nyakenye, uvakashele unina wezingane zakhe ezimbili, uNkz Phindile Khuzwayo (31), kanti kuzosuka ingxabano, wamdubula.
Kuthe uma uNkz Hlengiwe Khuzwayo, ongudadewabo omncane kanina wezingane zalona wesilisa ezwa umsindo wesibhamu ekamelweni likadedewabo, waphuthuma eyobheka ukuthi kwenzenjani. Kuthe efika wabuza kumsolwa ukuthi kwenzenjani.
Impendulo kube yinganono. Umdubule esifubeni waphu- thunyiswa esibhedlela, okuyilapho eshonele khona ngakusasa.
Umthombo osondelene nalo mndeni, utshele ILANGA ukuthi selokhu senzekile lesi sigameko, umsolwa akaphindanga walubhada eRichmond Farm, kanti nangosuku lomngcwabo ubengekho.
“Izingane zakhe selokhu zimgcine mhla ebulala unina. Bese zisizwa ngomakhelwane namanye amalungu omndeni ngezinto zesikole.
"Sikholwa wukuthi ukuboshwa kwakhe kuzopholisa amanxeba nasemndenini njengoba bewuhlala uzibuza ukuthi ukuziphi izintaba,” kusho lo mthombo.
Okhulumela amaphoyisa KwaZulu-Natal, uLt Colonel Thulani Zwane, uthe ngesikhathi umsolwa eboshwa utholakale nesibhamu sohlobo lwe9mm, esingekho emthethweni nezinhlamvu.
Kumanje ugcinwe esitokisini saseNtuzuma kanti kulindeleke ukuthi avele namhlanje ngoMsombuluko eNkantolo yeMantshi khona eNtuzuma.