Bagubhe olwezithandani nabazalwane
BAJABULISE okwezingane ezincane uKhaya noNtando Mthethwa ngesikhathi begubha usuku lwezithandani okokuqala beshadile.
UKhaya udume kakhulu ngesikhathi ehlwitha isicoco seIdols ngonyaka wezi-2013, bebesemcimbini obuhlelwe ngamalungu ebandla i- Oasis eholwa nguyise kaKhaya, uMnuz Bhekithemba Mthethwa.
Isiqubulo salo mcimbi obuseBukhosini Club House eSiphingo besithi: ‘ Couples Network #ShadaNawe’ okuchaza ukuthi wonke umuntu osothandweni akabophe ifindo likasofasilahlane.
Umcimbi ubuseqophelweni eliphezulu, iziphuzo ezithambile zichithiwe kanti umuntu nomuntu ubehleli eduze kwesithandwa sakhe.
Umfundisi Mncedisi Nyathikazi ubeyisikhulumi esiqavile, egqugquzela abazalwane ukuba bathande imindeni yabo.
Ngesikhathi umcimbi uqhubeka uKhaya noNtando bebelokhu bezishutha behleli otshanini kubonakala ukuthi bajabule.
ILANGA likhulume noNtando ukuzwa ukuthi uzizwa kanjani ephakathi kwabazalwane abashadile okokuqala, uthe: “Ngijabule kakhulu, okokuqala empilweni yami ngihleli nabantu abashadile, ngizwa uvo lwabo.
“Abanye bebethi sekuphele iminyaka engama-30 beshadile nokuyinto emnandi ukuyizwa. Lokhu kuyavuselela futhi kubonisa ukuthi nomunye umuntu angayihamba le ndlela.”
Umhleli womcimbi, uNomusa Mthethwa, ubonge kakhulu ababeyingxenye yomcimbi.
“Lapha sigubha iValentine ngoba thina bazalwane ngeke sisayigubha njengoba izoba phakathi nezinsuku,” kusho yena.
Usuku lwezithandani lungoLwesithathu.