ABAKWA-ISRAEL BASONGELA I-IRAN ABAYISOLA NGOCHUKU
UNDUNANKULU wakwa-Israel, uMnu Benjamin Netanyahu, uthi izwe lakhe ngeke lizithele ngabandayo uma lihlaselwa, lizozivikela.
Ukusho lokhu emuva kokuba amasosha ezwe lakhe ehlasele kanzima izindawo ezithile eSyria - ebhekene nempi yangaphakathi kusukela ngonyaka wezi-2011. U-Israel ugasele eSyria ngoba ufuna ukuqeda ngamasosha aseIran emuva kokuba uthi unqande isiphuphuthekindiza ( drone) saleliya lizwe seqa umngcele ohlukanisa u-Israel neSyria. I-Iran iyaziphika lezi zinsolo.
Ngesikhathi u-Israel uhlasela, indiza yawo eyi-F-16, ithelwe othulini ngamasosha aseSyria. Iwele enyakatho no-Israel. Abashayeli bale ndiza baphume isemoyeni baphuthunyiswa esibhedlela. Kukholakala ukuthi kugcine ngonyaka wezi-2006 ukuthi kube nendiza yakwa-Israel esala empini.
UMnu Netanyahu uxwayise ngokuthi umgomo wakwa-Isarel wokuzivikela uma ifakwa umunwe ehlweni, ucace bha okwekati elimhlophe ehlungwini. “I-Iran iyasichukuluza nje kwaphela, indizise isiphuphuthekindiza sayo sisuka eSyria sibheke kwa-Israel. U-Israel usola i-Iran nabangani bayo baseSyria ngalesi sigameko,” kusho uMnu Netanyahu. Uthe ngeke bavume ukuthi umbutho wezempi wase-Iran ube namandla eSyria kodwa wathi emhlanganweni nezinhloko zeze-
mpi, izwe lakhe lizoshumayela uxolo inqobo nje uma: i-United State of America (USA) yeseka ilungelo layo lokuzivikela futhi isola i-Iran ngokuyichukuluza.
Ekhuluma ngocingo noMengameli waseRussia, uMnu Vladimir Putin, uMnu Netanyahu uthe kubalulekile ukuthi kuqashelwe ukuthi udungunyane kaluqhubekeli phambili.
I-Iran iyinkukhu nempaka noIsrael, amasosha ayo sekunesikhathi elwa nezihonga zaseSyria, kusukela kuqale impi yangaphakathi ngowezi-2011.
Ithumele abacebisi bezempi, amavolontiya empi, ngamakhulu ngamakhulu amasosha aphuma embuthweni wayo owaziwa ngeleQuds Force obhekana kakhulu nokujutshwa ezindaweni ezingaphandle kwezwe lawo.
IQuds Force le iwuphiko lweIranian Revolutionary Guards Corps (IRGC).
Kusokala ukuthi i-Iran ithumele nezinkulungwane ngezinkulungwane zezikhali eSyria ukulekelela amabutho kaMengameli Bashar al-Assad neHezbollah - edlelana ne-Iran.