UMorrison ubalisa ngobuhlungu kwi-Bucs
Uthi ucishe waxoshelwa ubala
UDALULA ubuhlungu abhekane nabo kwiOrlando Pirates umdlali wayo ophenduke iqhawe eyifaka emzuliswaneni wesibili weNedbank Cup.
IBucs iguqise i-Ajax Cape Town ngo-2-0 koweNedbank Cup Last 32 ngoMgqibelo ebusuku e-Orlando Stadium, eSoweto.
UBernard Morrison odabuka eGhana ube yiqhawe eshaya amagoli amabili kulo mdlalo okuyiwona afake amaBhakabhaka kwi- last 16.
Lo mdlali ushaya la magoli nje, kuke kwasabalala imibiko yokuthi angase ahambe njengoba ubengadlali. Kuvele ukuthi ithimba labaqeqeshi belihlela ukumxosha ngoba ubengayisizi ngalutho ikilabhu. Ubesemataniswa namakilabhu ase-Europe njengoba bekuvulwe iwindi lokudayiselana ngabadlali ngenyanga eyedlule kodwa wangahamba.
Lo mdlali uthi uke wabhekana nobunzima kwiBucs futhi angeke abukhohlwe.
“Ngesikhathi ngisayina kwiPirates ngijabule ngendlela eyisimanga ngoba bengizodlalela ikilabhu enkulu. Nokho ngifike izinto zangangihambela kahle kangangoba ngicishe ngaxoshwa. Kulezi zinyanga ezedlule bekunzima kwiPirates ngoba bengibona ukuthi ngizoxoshwa.
“Kubuhlungu ukuxoshwa, ikakhulukazi uma uzoxoshelwa ubala. Ibhola ngiyalazi inkinga yami nje wukuthi ibhola laseNingizimu Afrika linzima, kuthatha isikhathi ukuthi ulijwayele ngoba lihlukile kanti nabadlali bakhona bakhaliphile.
"Ngiyabonga kakhulu ngethuba engilinikwe ngabaqeqeshi. Ngethemba ukuthi izinto zizoqhubeka nokungihambela kahle nekilabhu inqobe imidlalo ngokunjalo,” kusho uMorrison.
Ube eseveza nokuthi usizwe kakhulu ngumsizi womqeqeshi, uRhulani Mokwena, ngaphambi kwalo mdlalo.
“Ngibe nomhlangano noRhulani ehhotela ngaphambi kwalo mdlalo wangitshela eziqwini zamehlo ukuthi banginika leli thuba ukuze ngizibonaka- lise kubalandeli bePirates nakimina uqobo ukuthi ngingenza kangcono. Ngilibambe ngezandla zombili ngakhombisa kuRhulani ukuthi ngiyalibonga ithuba abanginike lona,” kusho uMorrison.