UBOSHWA KWI-FIFA OKHONJWE INDLELA KWEYE-PSL
UBOSHWA kwiFederation of International Football Association (Fifa) uKostadin Papic osanda kukhonjwa indlela yiRoyal Eagles abengumqeqeshi wayo.
ILANGA lithole ngemithombo yalo engashayi eceleni ukuthi uPapic ubelolonga ejeqeza kwiEagles kwazise ujijinyezwa yiBunna yase-Ethiopia obekwenza angayitholi imiphumela emihle.
UPapic ujoyine i-Eagles esuka kule kilabhu abesayine iminyaka emibili kuyona kodwa wasebenza izinyanga ezimbili nje kuphela.
Izindaba zokuboshwa kuka- Papic ziqinisekiswe nguTebogo Mothlante ongumshushisi wamacala kwiSouth African Football Association (Safa).
“Ngingakuqinisekisa ukuthi iFifa isazisile ukuthi kunecala elifakwe kuyona elithinta uPapic.
"Thina kasingeni kulona kodwa beyisazisa ngoba (uPapic) ubesebenza enhlanganweni engaphansi kwethu,” kusho uMothlante.
Imizamo yokuthola uSbusiso benoShawn Mpisane abangabanikazi be-Eagles ukucaciseleka ukuthi bebazi yini ukuthi ukhungethwe yizinkinga, kayiphumelelanga kwazise ngesikhathi sokuloba le kilabhu ibinomdlalo omqoka neHappy Wanderers weNedbank Cup Last 32 eSugar Ray Xulu Stadium, eClermont.
Leli phephandaba lithole ukuthi iBunna ifuna uR1,5 million kuPapic ngokuphula kwakhe isivumelwano.
UPapic uzakhele udumo ebholeni lakuleli elolonga i-Orlando Pirates neKaizer Chiefs eminyakeni eminingi edlule.