KUZOQINISWA EZOKUPHEPHA KOWE-NATAL UTD NOMVOTI FC
ZIZOQINISWA kakhulu ezokuphepha emdlalweni wezimbangi ezinkulu kwiSouth African Football Association (Safa) KwaZulu-Natal ABC Motsepe League, iNatal United noMvoti FC, ozokuba ngoLwesithathu ngo-15h00 eMzisho Stadium, eMsinga.
UKwenzakwakhe Ngwenya osekomidini lezemiqhudelwano leSafa, utshele ILANGA ukuthi bazoqinisekisa ukuthi amaphoyisa ayaphithizela kulo mdlalo kusuka uqala uze uyophela kwazise kuyashuba uma ebhekene njengoba engomkhaya.
Ngakolunye uhlangothi, uSmut Ndlovu ocija iNatal, utshele leli phephandaba ukuthi kabazimisele nakancane ngokuphoxa kulo mdlalo.
Uthi bazolwela ukugcina irekhodi labo lokungehlulwa ekhaya. Uthi amalungiselelo ahamba kahle.
“Kasikaze sehlulwe ekhaya kule sizini. Lokhu kungimisa isibindi. Siwulungele lo mdlalo futhi ufike ngesikhathi esihle. Sesilinde uLwesithathu zibulalane ensimini.
"Nokho ngihlukumezekile kancane emoyeni kwazise namanje akukacaci ngabadlali bami abanokuthinteka, ngisalinde isinqumo sikadokotela ngoNkosinathi Siyaya, uS’phamandla Shelembe noSandile Mkhwanazi,” kusho uNdlovu.
UBheka “Mlisa” Phakathi ocija uMvoti FC, uthi ulindele ubunzima kulo mdlalo ikakhulukazi njengoba bezokube bedlalela ekuhambeni. Uthi indlela abadlali bakhe abazimisele ngayo iyamumangalisa.
Uthi uyazi ukuthi neNatal icuthele ithuba lokuyodlala imidlalo yokuhlungela ukunyukela kwiNational First Division (NFD).
“Kuvunguza umoya wobunye ejimini. Abadlali sebeyayibona indlela ebheke empumelelweni. Uzokuba nzima lo mdlalo nokho nginalo ithemba lokuthi sizobuya namaphuzu agcwele ukuqinisa indawo yethu esicongweni. Ngizokuya kulo mdlalo ngaphandle kukaMondli Dladla olimale ngedlule,” kusho uPhakathi.
Isiyonke imidlalo yeSafa KZN ABC Motsepe League engoLwesithathu imi kanje:
ESouth Coast Academy: Happy Wanderers vs Drakensburg FC 15h00.
EMhlathuze Sports Complex: Milford FC vs Maritzburg City 15h00.
EMakhehleni Ground: KwaMashu All Stars vs Ashley United 15h00.
EDarnall Grounds: KwaDukuzaUnited vs Edendale Juventus 15h00.
EKandahar: Ladysmith United FC vs Ses’Khona FC 15h00.
EKing Zwelithini: Durban FC vs Summerfield Dynamos 15h00.
EMzisho Stadium: Natal United FC vs UMvoti FC 15h00.