UKhwela uzogwedla ephuke umoya
Ungqongqelwe yimoto ngaphambi kwalo mjaho
UZOQALA umjaho weDusi Canoe Marathon exoveke umoya uSibonelo Khwela othwele amathemba abantu abamnyama kulo mjaho ozoqala ngoLwesine eMgungundlovu usongwe ngoMgqibelo eBlue Lagoon yodumo eThekwini.
UKhwela wehlelwe wumshophi kusha imoto yakhe ethwala izingane zesikole nxa zisuka eShongweni zilibangise eChatsworth.
Uthi le moto ingqongqe ilayishe izingane ziphikelele esikoleni. Uthi umshayeli ubone ishunqa intuthu wabe eseyimisa eceleni komgwaqo wehlisa izingane ngokushesha, emuva kwemizuzwana yagqamuka amalangabi, yasha yaphela.
Yize ehlelwe yilo mshophi uKhwela, uthi uzoqhubeka nokubamba iqhaza kulo mjaho wanonyaka azwakalise ukuthi uwubheke ngabomvu.
NgoLwesine umjaho uzoqedwa eDusi Bridge (No 9), ngoLwesihlanu uphele eNanda Dam bese ngoMgqibelo usongwa eBlue Lagoon.
UKhwela ungomunye wabagwedli abamnyama abathwelwe ngeqoma emjahweni wanonyaka njengoba uyiK2 (begwedla ngababili). Nonyaka uzokube egwedla noSiseko Ntondini ongelona ivu- kana kulo mdlalo njengoba ejwayele ukungena nabokuqala abali-10.
UKhwela noNtondini babhekwe ngabomvu ukuba baqede ukuchanasa kwabagwedli abamhlophe njengoba engekho (umgwedli) omnyama oseke wawunqoba ehamba yedwa.
Bawunqoba kuphela uma begwedla nabamhlophe.
Kuzokhumbuleka ukuthi uKhwela uwunqobe egwedla no- Andy Birkett ngowezi-2014 kwathi uMichael Mbanjwa waba yingqwele ngowezi-2008 egwedla noMartin Dreyer (osenesikhungo sokuthuthukisa abagwedli abamnyama).
UKhwela ugijime imijaho eminingi ezilungiselela lo mjaho. Phakathi kwayigijimile yi-Ozzie Gladwin Canoe, yi-50 miler neCamps to Dusi Bridge. Kuyona yonke le mijaho ubegwedla noNtondini.
Ephawula ngesomiso esihlasele iNingizimu Afrika uKhwela, uthe asisabethusi ngoba sebejwayele.
Uthi abadidiyeli balo mjaho bathembise ukuthi bazodedela amanzi eHenley Dam kwazise maningi khona njengoba imvula ibiyishaya eMgungundlovu.
UKhwela noNtondini kubhekwe ukuba bathwale kanzima kuBirkett oyingqwele futhi osewunqobe kaningi lo mjaho ozokube egwedla noHank McGregor kanjalo nakuBanetse Msiya ozokube egwedla no-Ant Stott.
...babhekwe ukuba baqede ukucanasa kwabagwedli abamhlophe...