I-ARROWS IGWEMA UKUQHUZULWA YITSHE ELILODWA KABILI
IGWEMA ukuqhuzulwa yitshe elilodwa kabili iLamontville Golden Arrows Reserves edinga amaphuzu amathathu kuphela ukuze igcotshwe njengezingqwele ezintsha zeMultiChoice Diski Challenge (MDC).
I-Arrows Reserves izodudulana ne-Orlando Pirates Reserves ngeSonto ngo-12h00 eMakhulong Stadium, eGauteng. UVusi “Kanu” Vilakazi ololonga i-Arrows Reserves, uthi kusukela namhlanje ngoMsombuluko uzoshumayela ivangeli lokuthi kunqotshwe iPirates Reserves ekhempini yabo.
“Abadlali bethu besibanike ikhefu kule mpelasonto. Amalungiselelo omdlalo wethu nePirates Reserves aqala kusasa (namuhla ngoMsombuluko). Angifuni ukuthi siye emdlalweni wokugcina sinengcindezi yokunqoba. Ngesikhathi sinqoba lo mqhudelwano eminyakeni edlule sithwale kanzima ngoba siqukule inkomishi ngosuku lokugcina.
“Ukunqoba kwethu iPirates Reserves kuzokwenza ukuthi siye emdlalweni wokugcina sesivele siyizingqwele. Akumele siqhuzulwe yitshe elilodwa kabili,” kusho uVilakazi obeyisilomo sale kilabhu phambilini.
UVilakazi uthi akumkhathazi nhlobo ukuthuthwa komdlalo wabo wasekhaya uyiswe eMakhulong. Uthi imidlalo emibili abayinqobile bekungeyasekuhambeni. Lo mdlalo uyingxenye yehambisana nomcimbi wobumnandi eboniswa bukhoma kwiSuperSport.
Izingqwele zeMDC zizokuya kothekela ulwazi eSpain. Bezivamise ukuvakashela eNetherlands kodwa kulo nyaka abakwaMultiChoice banqume ukuthi kushintshwe umoya.