USAKHALA NGEMINJUNJU UMQEQESHI WE-BUCS
USAKHALA ngeminjunju uMilutin “Micho” Sredojevic ongumqeqeshi weOrlando Pirates ejabulise abalandeli bayo ingena ishushuluza esigabeni sikalast 16 seNedbank Cup.
IPirates izibuyise zishisa izinduku kwiAjax Cape Town iyiguqisa ngo-2-0 kwiNedbank Cup Last 32 ngoMgqibelo ebusuku e-Orlando Stadium, eSoweto. UBernard Morrison odlala esiswini kwiBucs ube yiqhawe eshaya amagoli amabili kulo mdlalo.
IBucs ithokozise abalandeli bayo ngokunqoba lo mdlalo kwazise ibiziphindiselela njengoba i-Ajax iyitaxe ngo-3-0 ovuthayo koweAbsa Premiership emasontweni ambalwa edlule eCape Town.
USredojevic opheka iBucs, uzwakalise ukungagculiseki ngezakhe yize zinqobile.
“Okungijabulisile kulo mdlalo wukuthi sidlulele emzuliswaneni olandelayo ngaphandle kwalokho akukho okunye. I-Ajax ingizwise ubuhlungu isihlula ngo-3-0 ngeledlule, kulo mdlalo bengihlose ukuba siziphindiselele nge-mbudlu yamagoli.
“Besinalo ithuba lokukwenza lokho uma ubheka amathuba esiwatholile kodwa sangawasebenzisa. Amagoli esiwahlohlile mancane kakhulu kufana nokuthi kasizange siziphindiselele, bengifuna siyishayisise. Nokho ngoba abalandeli bajabulile akunankinga.
“Kodwa-ke kimina abukapheli ubuhlungu engibuzwiswe yi-Ajax isihlula ngo-3-0.
"Phela bengiqala ukushaywa kabuhlungu kanjena ekubeni umdlalo siwuthwele,” kusho uSredojevic.
UMuhsin Ertugral ocija i-Ajax, uyivumile induku yeBucs.
“IPirates ibingcono kakhulu kunathi bekufanele isehlule.
"Kubonakale zisuka ukuthi iwulangazelele lo mdlalo uma ubheka indlela esiphuthume ngayo. Ngiyayibongela, ngiyifisela inhlanhla kulo mqhudelwano,” kusho u-Ertugral.