BEKUPHUME NESINEDOLO EMKHOSINI WOMTHAYI
Ungqongqoshe ukhala ngolwezimoto
BEKUPHUME nezihambeli ezivela emazweni angomakhelwane beNingizimu Afrika ngoMgqibelo eMkhosini woMthayi, ogujwa yisizwe sakwaTembe KwaNgwanase, eMkhanyakude, enyakathompumalanga yeKwaZulu-Natal.
Lo mkhosi obuye waziwe ngoMkhosi wamaGanu, ubuwenziwe ehlalankosi leNkosi Mabhudu Tembe, khona KwaNgwanase. Uthathwa njengomgubho obaluleke ukuyedlula yonke kulesi sizwe ngakho belu ukudonsa nezikhulu zamazwe angomakhalwane, okubalwa ezaseMozambique nezaseSwaziland.
Izithunywa zaseSwaziland beziholwa nguMnu Scelo Dlamini wasendlunkulu yakuleliya lizwe obuye abe kuhulumeni wakhona.
UMnu Dlamini uthe: “Indlunkulu yesizwe sakwaDlamini eSwaziland ingiphathise umyalezo wokuba ngifike ngisho ukuthi nina balapha KwaMhlabuyalingana neMozambique, nibugcine ubudlelwano benu obuhle, kuvunguze umoya wothando kubo abantu bakulesi sizwe neKwaZulu-Natal yonkana.”
Umemezele ukuthi lo mkhosi uzobe wenziwe eSwaziland ngempelasonto esibheke kuyona.
UMnu Governor Matutwini, obehola izihambeli ezivela kuhulumeni waseMozambique, uthe kuyamthokozisa ukuthi “namuhla ngizogubha nani bafowethu umkhosi woMthayi”.
Uthe ozakwabo eMozambique bamphathise umyalezo wokuba kugxilwe entuthukweni ezodala ukunethezeka kubantu bakwaTembe. “Siyanxusa nokuba intsha ingawubukeli phansi lo mkhosi kodwa mayisondele ukuze ibone okuningi,” kusho uMnu Matutwini.
UNgqongqoshe wezokuThuthu- kiswa koMnotho, ukuNgcebeleka nezokuVakasha KwaZulu-Natal, uMnu Sihle Zikalala, uphathise umyalezo kuMnu Matutwini wokuba axoxe nezikhulu zakuleliya lizwe ngodaba lwezimoto ezintshontshwe kuleli zaweliswa umngcele, zayiswa eMozambique - okubikwa ukuthi ezinye zazo zihamba izikhulu zakhona.
Uthe yena nomnyango wakhe bayaweseka uMthayi ngoba ubamba elikhulu iqhaza kwezokuvakasha, okuhlomulisa abantu abanamabhizinisi ezindawo zokulala.
INkosi Tembe ithe akulona usuku lwezinkulumo ngaphandle kokuthi kusinwe kubuswe, emuva kwalokho kudliwe inyama kwehliswe ngotshwala bamaganu.
“Kuyisifiso sami ukuba uNgqongqoshe Zikalala angene agamanxe odabeni lwesiqiwu iSimangaliso Wetland Park ukuze kuvuleleke amathuba amaningi aye kubantu.
“Ngeke ngingaphawuli ngodaba lwenkinga esithathe iminyaka eminingi yokuntshontshwa kwezimoto kule ndawo ziweliswe umngcele ohlukanisa iNingizimu Afrika neMozambique engxenyeni eseManguzi, eKos Bay naseNsalamanga.
“Amaphoyisa uma elandela imoto noma impahla esuke intshontshiwe, ayahlukunyezwa. Kwesinye isikhathi nawo siyawasola ngokuhudula izinyawo ezindabeni zalolu hlobo ngoba silokhu sitshelwa ukuthi kwenziwa uphenyo nalo olubuye lungapheli,” kusho iNkosi Tembe.
UMkhosi woMthayi uvula amathuba amaningi nasemacikweni esifundeni uMkhanyakude. Phakathi kwabaculi abashiyelane inkundla kulo mkhosi kubalwa uZero Khumalo - ongumfowabo kaMfazomnyama - wuMvelase noDumsani Qwabe.