I-CHIEFS NOMYALEZO OSHUBILE KWI-DOWNS
UKomphela useqine idolo ngesicoco seligi
USTEVE “Mphathi” Komphela ongumqeqeshi weKaizer Chiefs uthumele umlayezo onzima kuPitso “Jingles” Mosimane ololonga iMamelodi Sundowns.
IChiefs iguqise iCape Town City ngo-1-0 wegoli likaRyan Moon kowe-Absa Premiership ngoMgqibelo ebusuku eFNB Stadium, eSoweto.
UMoon usephenduke isilomo kubalandeli beChiefs njengoba engalibheki ipali.
Useshaye amagoli amane emidlalweni eyisihlanu ayiqalile okuyirekhodi elihle.
Lo mphumela ubeke iChiefs endaweni yesibili kwi- log, emhlane weSundowns. Lokhu kwenze uKomphela wathumela umyalezo kwiDowns.
“Ngifuna ukubatshela nje ukuthi siyeza, futhi siza kancane. Kasijahe lutho, sibhekana nomdlalo siqede ngawo bese sidlulela komunye.
"Ngendlela esenza kahle ngayo kulezi zinsuku ngibuyelwa yithemba ngesicoco seligi. Okufanele sikuqinisekise wukuthi kasigudluki emgqigqweni wethu.
“Abadlali bami bayazi ukuthi sijaha obani, sisezithendeni zabo. Ngijabule ngendlela esidlala ngayo.
"Ngibonga kakhulu ukuzinikela kwabadlali.
"Ngaphambi komdlalo, ngiphathwa yikhanda, liyazula uma kufanele ngibophele isikimu ngoba izandla zabo ziphezulu. Nokho yikhanda elimnandi, liyangijabulisa kunokulinyalelwa,” kusho uKomphela.
UBenni McCarthy ololonga iCity, uthi bekufanele bahlulwe kulo mdlalo.
“Njengoba kuqala isonto nje into engizoyenza wukudedela isibhaxu somlomo kubadlali.
"Basenzele phansi kulo mdlalo. Besingakhululekile uma siphethe ibhola, iChiefs ibisicindezele. Bekufanele iwunqobe lo mdlalo ibingcono kunathi. Nokho kasinalo uvalo nge- top 8 sizosonga isizini sikuyona.
Wukuthi nje kufanele ngithethe ngoba kunabadlali abangazange basinike lutho kulo mdlalo,” kusho uMcCarthy.
Isiyonke imiphumela yemidlalo yangempelasonto ye-Absa Premiership imi kanje: Kaizer Chiefs 1, Cape Town City 0; Baroka FC 0, Chippa United 0; Golden Arrows 1, Bidvest Wits 2; Maritzburg United 2, AmaZulu FC 0.