Sibhekwe ngabomvu isabelomali
Bafuna ungqongqoshe acacise ngolwemfundo yamahhala
SIBHEKWE ngabomvu isabelomali salo nyaka okulindeleke ukuba sethulwe nguNgqongqoshe wezeMali, uMnu Malusi Gigaba, ngoLwesithathu.
Okwenza abaningi balale bengalele, belindele uLwesithathu, wukuthi bafuna ukuzwa ukuthi ungqongqoshe uzokhuluma ngezinto ebezithenjiswe nguMnu Jacob Zuma osule kwesokwengamela izwe ngoLwesithathu olwedlule, noma isabelomali sizohamba emagameni kaMengameli Cyril Ramaphosa - ongakaqedi nesonto ekulesi sikhundla - awasho kwiState of the Nation Address (Sona) ngoLwesi-hlanu.
Okuhamba phambili kokushiwo nguMengameli Ramaphosa wukuthi noma kanjani izoba khona imfundo yamahhala kubafundi abenza unyaka wokuqala abaqhamuka emindenini ehola imali engango-R350 000 ngonyaka.
Ubehamba emazwini kaMnu Zuma awasho ngaphambi kwengqungquthela ye-ANC ngoZibandlela, esuse umsindo kubuzwa ukuthi izovelaphi imali yokulekelela kulolu hlelo.
“Impela abafundi abenza unyaka wokuqala bazoyithola imfundo yamahhala. Ungqongqoshe wemfundo esemazingeni aphezulu uzohlola ukuthi izokwethulwa kanjani kanti nongqongqoshe wezemali njengoba ezokwethula isabe- lomali sakhe ngoLwesithathu, uzochaza kabanzi ukuthi izosebenza kanjani,” kusho uMengameli Ramaphosa. Ilungu lephalamende le-IFP, uMnu Narend Singh, ekhuluma neLANGA izolo uthe okokuqala abazobe bekubhekile
kule nkulumo kangqongqoshe wukuzwa ukuthi iNingizimu Afrika izowuvala kanjani lo mgodi ka-R50 billion esiyeqe ngawo emalini enawo. ( national budget deficit). “Sifuna ukuzwa ukuthi isikhona yini imali ebekelwe isivumelwano sokuphe- hlwa kwenuzi kuleli. Izothathwaphi le mali okuthiwa izonikeza abafundi imfundo yamahhala?" kubuza uMnu Singh.
Umholi weDA, uMnu Zwakele Mncwango, uthi ungqongqoshe bafuna acacise ukuthi izovelaphi imali yemfundo yamahhala, angagcini esethi uzokwenyusa intela. “Ngokwethu imfundo yamahhala uhulumeni ungakwazi ukuyinikeza abafundi abahlwempu uma uzokwazi ukuhlela imali isebenze ngendlela efanele.
"Kunemali la engango-R90 billion esetshenziswe wuhumeni kusukela ngowe-1994 uthenga amapulazi, okumanje ahleli kawasebenzi, amanye izikhulu zikahulumeni bezihlomula kuwona ezenzweni zenkohlakalo njenge-Estina Dairy Farm, yaseFree State.
"Imali le engaka echithwe kutakulwa iSouth African Airways no-Eskom ibingasiza kule mfundo yamahhala,” kusho uMnu Mncwango.
Isazi sezomnotho, uSolwazi Bonke Dumisa, sithi yize sisihle isiphakamiso sokuba abafundi abahlwempu banikwe imfundo yamahhala, kodwa lesi sinqumo sikamengameli besiwukugagamela njengoba iNingizimu Afrika ingenayo imali.
“SiyiNingizimu Afrika siphila ngemali esingenayo engango-R50 billion. Uma sithi abafundi mabanikwe imfundo yamahhala, ngabakhokhi bentela abazoshayeka. Kuzophoqeleka ukuba kwenyuswe iVAT okumanje ihleli ku-14% njengoba igcine ukwenyuka ngaphambi konyaka we-1994.
"Ukwenyuka kweVAT kuzoshaya wonke umuntu, kuzosho ukuthi imali esiyikhokhela ugesi, ukudla nama- rate izokwenyuka.
"Kangiboni ukuthi uhulumeni ungasebenzisa le ndlela yokuboleka imali ngaphandle njengoba izoba nenzalo enkulu emuva kokuba umnotho wakuleli wehlisiwe (yizinhlangano ezikala izinga lomnotho)," kusho uSol Dumisa.
Kulindeleke ukuba nentela kaphethiloli ekhokhelwa ukungcoliswa komoya, yenyuke. Nentela ekhokhwa ngumuntu ngamunye osomnotho bathi izonyuka kusukela ema41% kuya ema-43 kubo bonde abahola imali engaphezu kuka-R700 000 ngonyaka, kube ngama45% kuya ema-48% kwabahola engaphezu kuka-R1.4 million.