I-AFRIFORUM ISONGELA UMSHOLOZI

IBHEKWE yisambane indodana kaMnu Jacob Zuma, uDuduzani, ezingeliswa okwenyamazane.

Ziyanda izinkinga zayo ezimayelana nokwephula umthetho njengoba silobe izolo ngeSonto isinyukile imali ezonikwa ongasiza ngolwazi lokuthi ihobe kuphi yona noMnu Atul Gupta womndeni ongabangani bakayise (uMnu Jacob Zuma).

Ngaphandle kokwenyuka kwalo mehlokaboni uze uyoshaya ku-R2 million, uDuduzani uvukelwa nawudaba angase ashushiswe ngalo yiNational Procecuting Authority (NPA) ngengozi athinteka kuyona yangowezi-2014, lapho kushone khona owesifazane onguNkz Phumzile Dube. Silobe izolo esafunwa uDuduzani noMnu Gupta.

Abaningi balobe kwiTwitter bethi bangayikhipha imali yokunika ozosiza anikezele ngomkhondo wala madoda amabili. IForensics for Justice, ikhiphe u-R100 000, isikhulu esiphezulu seSygnia Asset Management, uNkk Magda Wierczycka, naso siphonse itshe esivivaneni, umehlokaboni wayoshaya ku-R1 million.

UMnu Phiwa Nkambule, oyisikhulu seRiovic, ukhiphe u-R400 000. La madoda afunelwa inkohlakalo eyenzeke epulazini i-Estina, eVrede, eFree State ebelihlelelwe ukutakula abamnyama abampofu. UDuduzani sekuvela ukuthi iNhloko yeNPA, u-Adv Shaun Abrahams, icubungula isinqumo sokungashushiswa kwakhe ngecala lokubulala ngokungenhloso.

Imoto yakhe ishayisane netekisi emgwaqweni uM1 eSandton, eGoli ngowezi-2014 kwafa uNkz Dube. Idokodo elivuliwe ngesikhathi sengozi, lithole ukuthi akukho okubi akwenzile okuholele kule ngozi. Inhloko yophiko oluzimele lwezokushushisa kwi-Afriforum, u-Adv Gerrie Nel, ithumele incwadi kwiNPA egameni lomndeni wakwaDube, ifuna isitifiketi esicacisa ngezizathu zokungashushiswa kukaDuduzani, okungasiza lolu phiko ukuba lukwazi ukumshushisa ngasese.

U-Adv Abrahams utshele i-Afriforum ukuthi usasicubungula isinqumo, incwadi emayelana nalokho uthunyelelwe yona zimbili kuNhlolanja (February), ecelwa ukuba achaze ukuthi kungani ebona kungafanele ukuthweswa icala. Njengoba uDuduzani efunwa, iNews24 ibike ukuthi ushaye utshani mhla zili-18 kuMasingana (January) walibangisa eDubai, e-United Arab Emirates (UAE).

Isikhulu esiphezulu se-Afriforum, uMnu Kallie Kriel, sisamukele isinqumo seNPA sokushaya ungqimphothwe ngaleli cala, sathi lokhu kusho lukhulu emndenini wakwaDube nakubantu bakuleli “abese bedelile nguMnu Jacob Zuma, umndeni nabangani bakhe abebedlala umacashelana nomthetho”.

UMnu Kriel uthi uma u-Adv Abrahams ehluleka wukubeka uMnu Zuma (Jacob) amacala, u-Adv Nel ukulungele ukumshushisa ngasese. Kulindeleke ukuba iNPA imemezele ngoLwesihlanu ukuthi izowavusa yini amacala kaMnu Zuma.