Lzinsolo ezishaqisayo ngenyunyana iSadtu
Kuthiwa yaba izikhundla ngobungani
AYAQINA amahlebezi ngezinsolo zokwabiwa kwezikhundla zothisha okuthiwa kwenziwa ngezinye zezikhulu zeSouth African Democratic Teachers' Union (Sadtu) KwaZulu-Natal.
Kulezi zikhulu kukhona negama likanobhala wale nyunyana KwaZulu-Natal, uNkz Nomarashiya Caluza, njengoba kuthiwa uze wafonela izikhulu zoMnyango wezeMfundo kulesi sifundazwe ethi mazivimbe abathile bangangeni ezikhundleni, kungene abathandwa nguyena.
Kunencwadi ebhalwe mhla zili-12 kuNhlolanja ( February) nguMnu Mbuyiseni Mathonsi, oke waba ngunobhala wale nyunyana ngaphambi kokuba asebenzele uhulumeni - ILANGA elinayo ikhophi yayo - uNkz Caluza usolwa ngokutshela izikhulu zomnyango ukuba zifake abathile ezikhundleni.
Kule ncwadi kuvela ukuthi mhla zingama-30 kuMasingana ( January) wezi-2018, uNkz Caluza ushayele iNhloko yoMnyango wezeMfundo KwaZulu-Natal, uMnu Enoch Nzama, ecela ukuba isebenzisane naye ukwenza isiqiniseko sokuthi kabangeni ezikhundleni laba angabadingi.
Abanye bothisha okuvela ukuthi kabadingeki bangamalungu ayo iSadtu kanti kuthiwa bakhona nabezinye izinyunyana.
“Ngiyazi ukuthi wena ufonele uNzama nezinye izikhulu zezifunda ubatshela ukuthi mabasebenzise amandla abanawo bahlwithe amandla ezigungu ezilawula izikole okuqoka othisha kodwa baqokwe yikomidi elizokhethwa yiSadtu.
“Nginawo namagama abantu osubaqokile ukuthi bazongamela ukugcwaliswa kwezikhundla, ikakhulukazi esifundeni esiseningizimu yeTheku.
“Kuyadumaza ukuthi nabo baye bakulalela futhi bangacabanga nokukuthathela izinyathelo zomthetho ngalokhu obukwenza, ugxambukela emsebenzini wabo. Maduze nje, ngizokubhalela enye incwadi enobufakazi obuqanda ikhanda bokuthi inhlangano yakho (iSadtu) yaba izikhundla ngobungani nangobulungu njengoba zabelwa abangamalungu ayo kuphela.
“Ngiyazi nangohlelo olwenzile lokuphazamisa inhlolokhono ebiseMlazi zili-13 kuNhlolanja wezi2018. Ngibhale le ncwadi nje, ngilindele ukuba uziphendulele ukuthi kuyiqiniso yini noma kungamanga lokhu engikushoyo.
“Ngikunika ithuba lokuba usho ukuthi unamanga yini uNzama nezinye izikhulu uma bethi ubafonelile ufuna basebenzisane nawe ngokuqokwa kwabantu abathile ezikhundleni.
“Ngifuna unginike nezizathu ezinqala zokuthi kungani uthi kakufanele ngikubike kubantu abaphenya ngenkohlakalo, okubalwa oKlebe neSouth African Council for Educators (Sace),” kusho incwadi kaMnu Mathonsi.
Ethintwa yiLANGA mayelana nale ncwadi, uMnu Mathonsi uvumile ukuthi ibhalwe nguyena ngoba esekhathele yinkohlakalo yeSadtu.
“Le nhlangano siyisebenzele kanzima ukuze ibe yilokhu eyikhona, ngeke sivume uma sekunabantu abazofuna ukuyiwisa bhu ngezenzo zabo zenkohlakalo.
“Incwadi ngimbhalele ngethemba lokuthi uzophendula kodwa kwaze kwedlula isikhathi ebengimbekele sona. Into esengizoyenza, ngizobikela abasemandleni afanele ukuze kuthathwe izinyathelo ezifanele,” kusho uMnu Mathonsi.
UNkz Caluza uthi uyitholile incwadi kodwa akazange asibone isidingo sokuyiphendula ngoba beyivulelekile - ibhalelwe wonke umuntu.
“UMnu Mathonsi uyazi ukuthi uma enesikhalo kumele asiyise kuphi. Izinsolo zenkohlakalo, azibhekise kimi zinzima kabi, sengizidlulisele kubameli bami,” kusho yena.
Isikhulu esiphezulu seSace, uMnu George Moroasuri, sithe bayitholile incwadi kaMnu Mathonsi, bazophenya ngezinsolo ezikuyo. Imizamo yokuthola uMnu Nzama iphunzile njengoba ucingo lwakhe belukhala lungabanjwa.
Lugcine seluvaliwe.