Silindele ukufezwa kwezethembiso zikaRamaphosa
KUBUKEKA sengathi iningi lezakhamizi zaseNingizimu Afrika likwamukele ngezandla ezifudumele ukubekwa kukaMengameli Cyril Ramaphosa nenkulumo yakhe ngoLwesihlanu ebusuku ngezinhlelo zikahulumeni zalo nyaka.
Okulindelekile manje wukuba umengameli enze njengoba ethembisile. Isinyathelo sakhe sokuqala kufanele kube wukudiliza ongqongqoshe abangawenzi umsebenzi, aqoke amalungu ekhabhinethi aqotho, awukhathalele umsebenzi futhi awaziyo.
Uma enze njalo, lokho kuyomsiza akwazi ukufeza izethembiso azenzile. Kuzokhumbuleka ukuthi le khabhinethi ekhona njengamanje igcwele ongqongqoshe okubukeka sengathi bakhethwe ngobungani babo nokwethembeka kumengameli omdala, uMnu Jacob Zuma, hhayi ngoba bewazi umsebenzi wabo. Sethemba futhi ukuthi uzokwehlisa isibalo songqongqoshe namasekela abo. Uhulumeni kaMnu Zuma ubunongqongqoshe namasekela abalelwa ema-70 ngoba bekuthiwe isizathu salesi sibalo esikhulu kangaka yingoba kwenzelwa ukuthi bakwazi ukwenza umsebenzi kahulumeni ngendlela esheshayo nefanele.
Sekuwumlando manje ukuthi kunokuba izinhlelo zikahulumeni zihambe ngononina, okuphambene nalokho kwenzekile. Kubukeka sengathi ukuqasha abantu abaningi kangaka bekuyitulo lokuthenga ukwethembeka kuMnu Zuma, hhayi ngoba kuqondwe ukuthuthukisa izwe nabalakhele. Imisebenzi kayibonwa nesimo somnotho sibi kakhulu. Inkohlakalo nokwebiwa kwemali kufike kwelinye izinga elesabekayo. UMnu Ramaphosa kubhekeke ukuba alungise lesi simo esibi futhi abuyise ithemba kubantu ukuthi uhulumeni uyazi ukuthi wenzani. Njengoba eshilo enkulumeni yakhe, inselelo enkulu leli elibhekene nayo, wukwantuleka kwamathuba emisebenzi, ikakhulukazi entsheni.
Lesi simo kufanele silungiswe ngokushesha ngoba intsha eluvanzi, engenzi lutho, ingaba yingozi embusweni wezwe nokuthula ezweni. Uhulumeni kaMnu Ramaphosa uzodinga ukusebenzisana nabamabhizinisi nezinyunyana zezisebenzi ukuze kuqhanyukwe namaqhinga amasha okudala amathuba emisebenzi.
Sethemba ukuthi manje kuzokwenziwa umsebenzi, inciphe ingevu njengoba bekwenzeka phambilini, lapho uhulumeni ubaziwa ngokuhlela imihlangano engapheli, kudwetshwe izinhlaka zezinhlelo ngokuzokwenziwa, bese kugcina lapho.
Abantu balindele ukubona izinto zenzeka, kugcinwe izethembiso. UMnu Ramaphosa uyivale kahle inkulumo yakhe ngokufunda amazwi engoma yeciko le- jazz elisanda kudlula emhlabeni, esihloko sithi “Thuma Mina”. Lena yinselelo yokuthi abantu bangabheki nje ukwenzelwa izinto wuhulumeni, bahlale bekhangezile, kodwa bafunde ukuzenzela, bazibambele mathupha. Sethemba ukuthi ikhwelo likamengameli lizwakele. Nathi sithi sifikile isikhathi, phezu komkhono!
Makwande umsebenzi kunciphe engevini.